ទាន់ហេតុការណ៍
ឧត្តមសេនីយ៍ឯក រ័ត្ន ស្រ៊ាង ជួប​សំណេះសំណាល ថ្លែងអំណរគុណ ដល់​កម្លាំង​អាវុធហត្ថ​ក្រោម​ឱវាទ ទូទាំង​រាជធានី​ភ្នំពេញ​!==>​អាវុធហត្ថ​រាជធានី​ភ្នំពេញ ចូលរួម​អបអរសាទរ ទិវា​អន្តរជាតិ​នារី ៨ មីនា ខួប​លើក​ទី​១១៣!==>​ក្រុមការងារ អាវុធហត្ថ​រាជធានី​ភ្នំពេញ នាំយក​អំណោយ​ចុះសួរសុខទុក្ខ​សមាជិក ដែល​ជួប​គ្រោះថ្នាក់ ផ្ទុះ​ចង្ក្រានហ្គាស ធ្វើអោយ​រលាក​ខ្លួនប្រាណ​!==>ឧត្តមសេនីយ៍ឯក រ័ត្ន ស្រ៊ាង ចាត់​ក្រុមការងារ​អាវុធហត្ថ​ខណ្ឌ​ច្បារអំពៅ នាំយក​អំណោយ​ឧបត្ថម្ភ​ដល់​សមាជិក ដែល​បាន​គ្រោះថ្នាក់​ចរាចរណ៍ ពេល​កំពុង​បំពេញ​ភារកិច្ច​!==>នាយទាហាន នាយទាហានរង នៃ​កងរាជអាវុធហត្ថ​រាជធានី​ភ្នំពេញ ចំនួន ៣៧០​នាក់ ត្រូវបាន​ប្រកាស​តែងតាំង​មុខតំណែង និង​បំពាក់​ឋានន្តរសក្តិ​ថ្មី​!==>​ឯកឧត្ដម ថោ ជេដ្ឋា​ រដ្ឋមន្ត្រី​ក្រសួង​ធនធានទឹក ទទួល​ជួប​សម្តែងការគួរសម​ និង​ពិភាក្សាការងារ​ ជាមួយ​ អ្នកសម្របសម្រួលអង្គការ សហប្រជាជាតិប្រចាំកម្ពុជា ​លោក Joseth Scheuer==>ឧបនាយករដ្ឋមន្ត្រី ស៊ុន ចាន់ថុល៖រាជរដ្ឋាភិបាល ចាត់ទុកគម្រោងសាងសង់ផ្លូវ ៥០សេ និងស្ពានវែងជាងគេប្រវែង ៣.៣០០ម៉ែត្រ តភ្ជាប់ពីកំពង់ឆ្នាំង ទៅកំពង់ធំ ជាគម្រោងអាទិភាពដ៏សំខាន់សម្រាប់ឆ្នាំ ២០២៤នេះ==>អំណោយ​ប្រចាំខែ របស់លោក​ឧត្ដមសេនីយ៍ឯក រ័ត្ន ស្រ៊ាង បាន​ប្រគល់​ដល់ដៃ​ពលរដ្ឋ​ទីទាល់ក្រ​១៧​គ្រួសារ​!==>អាជ្ញាធរខេត្តបាត់ដំបង ដកហូតកាំ​ខ្យល់​ជិត​៣០​ដើម​សម្រាប់​លេង​បាញ់​តុក្កតា នៅ​ក្នុង​កម្មវិធី​បុណ្យបញ្ចុះសីមា​នៅ​វត្ត​អូរ​ដូន​ពៅ ស្ថិត​ក្នុង​ឃុំ​ឃ្លាំង​មាស ស្រុក​ប​វេ​ល ខ្លាច​អាច​បង្ក​គ្រោះថ្នាក់​ដល់​មនុស្ស==>លើកទឹកចិត្តគម្រោងចំនួន២នៅខេត្តព្រះសីហនុ ប្រាក់វិនិយោគជិត ៦០០លានដុល្លារ ទទួលការលើកទឹកចិត្តពី ក្រុមប្រឹក្សាអភិវឌ្ឍន៍កម្ពុជា និងត្រូវបានវាយតម្លៃថា នឹងជះឥទិ្ធពលយ៉ាងវិជ្ជមានដល់សេដ្ឋកិច្ចខេត្តព្រះសីហនុទាំងមូល

សម្ដេច​តេជោ ហ៊ុន សែន អញ្ជើញ​បើក​ការប្រកួត​កីឡា​ជាតិ​លើក​ទី​៣ និង​កីឡា​ជនពិការ​លើក​ទី​១

សម្ដេច​តេជោ ហ៊ុន សែន អញ្ជើញ​បើក​ការប្រកួត​កីឡា​ជាតិ​លើក​ទី​៣ និង​កីឡា​ជនពិការ​លើក​ទី​១
​ដោយ ៖ គេហទំព័រ «ស៊ី អេច ខេ ញូស៍ | CHK News»
Tel: 012 790 894 | Telegram / WhatsApp : 012 790 894

នៅ​ល្ងាច ថ្ងៃ​ចន្ទ ១៣​រោច ខែ​កត្តិក ឆ្នាំ​ខាល ចត្វា​ស័ក ព​.​ស​. ២៥៦៦ ត្រូវ​នឹង ថ្ងៃទី​២១ ខែវិច្ឆិកា ឆ្នាំ​២០២២​នេះ សម្ដេច​អគ្គមហាសេនាបតី​តេជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា បាន​អញ្ជើញ​បើក​ការប្រកួត​កីឡា​ជាតិ​លើក​ទី​៣ និង​កីឡា​ជនពិការ​លើក​ទី​១ នៅ​ពហុ​កីឡដ្ឋាន​ជាតិ​មរតក​តេជោ​។

​ពិធី​បើក​ការប្រកួត​កីឡា​ជាតិ​លើក​ទី​៣ និង​កីឡា​ជនពិការ​លើក​ទី​១ នេះ ជា​ការរៀបចំ​សាកល្បង​ដូច​ទៅ​នឹង​ការរៀបចំ​ពិធី​បើក​ការប្រកួត​កីឡា​ស៊ី​ហ្គេម និង​អាស៊ាន​ប៉ា​រ៉ា​ហ្គេម ឆ្នាំ​២០២៣ នាពេល​ខាងមុខ​ដែរ ដើម្បី​ធានាបាន​នូវ​សុវត្ថិភាព និង​សន្ដិសុខ សណ្ដាប់ធ្នាប់​ល្អ​។​

​នៅក្នុង​ឱកាស​នោះ​ផងដែរ សម្តេច​តេជោ ហ៊ុន សែន បាន​អញ្ជើញ​ថ្លែង​សន្ទរកថា​ដែលមាន​ខ្លឹមសារ​សំខាន់ៗ​ដូខចខាងក្រោម​៖ សម្តេច​តេជោ ហ៊ុន សែន ពិតជា​មាន​សេចក្ដី​រីករាយ​ដោយ​បាន​ចូលរួម​ក្នុង​ពិធី​បើក​ការប្រកួត​កីឡា​ជាតិ​លើក​ទី​៣ និង​កីឡា​ជនពិការ​ជាតិ​លើក​ទី​១ ដែល​ជា​ធម្មតា ការប្រកួត​កីឡា​ជាតិ​នេះ​ត្រូវ​រៀបចំ​ជា​រៀងរាល់ ២​ឆ្នាំ​ម្តង ប៉ុន្តែ​មាន​ការខកខាន​នៅ​ឆ្នាំ ២០២០ ដោយសារ​ការ​ផ្ទុះ​ឡើង​នៃ​ជំងឺ​កូវី​ដ​-១៩ ។ ឆ្នាំ​២០២២​នេះ គឺជា​ឆ្នាំ​ដ៏​មមាញឹក និង​ជា​ឆ្នាំ​ដ៏​មាន​សារៈសំខាន់​ជា​ប្រវត្តិសាស្ត្រ​សម្រាប់​ព្រះរាជាណាចក្រ​កម្ពុជា ។

​នា​ពេល​ថ្មីៗ​នេះ ក្នុងនាម​ជា​ប្រធាន​ប្ដូរ​វេន​អាស៊ាន កម្ពុជា​បាន​រៀបចំ​កិច្ចប្រជុំ​កំពូល​អាស៊ាន​លើ​ក​ទី ៤០ និង​ទី​៤១ ព្រមទាំង​កិច្ចប្រជុំ​កំពូល​ពាក់ព័ន្ធ ដោយ​រលូន និង​ទទួលបាន​ជោគជ័យ​ដ៏​ត្រ​ចេះ​ត្រចង់​ជូន​ជាតិ មាតុភូមិ ដោយ​ទទួលបាន​ការចូលរួម​យ៉ាងច្រើន​ពី​ថ្នាក់ដឹកនាំ​កំពូលៗ​នៃ​ប្រទេស​មហាអំណាច និង ប្រទេស​ជា​មិត្ត​នៅ​ក្នុង​តំបន់ និង​សកល ។

​សម្តេច​តេជោ​បាន​បន្តថា ព្រឹត្តិការណ៍​ជា​ប្រវត្តិសាស្ត្រ​នេះ​បាន​នាំមក​នូវ​កេរ្តិ៍ឈ្មោះ​ដ៏​ឧត្តុង្គឧត្តម កិត្តិយស​ដ៏​ធំធេង និង​ភាព​ល្បី​រន្ទឺ​ក្នុង​តំបន់ និង​អន្តរជាតិ​សម្រាប់​កម្ពុជា ព្រមទាំង​រួមចំណែក​ដល់​ការ​ផ្សាព្វផ្សាយ​អំពី​ព្រះរាជាណាចក្រ​កម្ពុ​ជា នៅលើ​ឆាក​អន្តរជាតិ​ទាំងមូល​។ ឆ្នាំ ២០២៣ ខាងមុខនេះ ដោយ​ទទួលបាន​ការគាំទ្រ​ពី​ប្រតិភូ​កីឡា​បណ្តា​ប្រទេស​អាស៊ី​អាគ្នេយ៍ កម្ពុជា​នឹង​ធ្វើ​ជា​ម្ចាស់ ផ្ទះ​រៀបចំ​ការប្រកួត​កីឡា​ស៊ី​ហ្គេម ( SEA Games ) និង អាស៊ាន​ប៉ា​រ៉ា​ហ្គេម (ASEAN Para Games) ដែល​ជា​ការប្រកួត​កម្រិត​អន្តរជាតិ​ដ៏​ធំ​នៅក្នុង​ព្រះរាជាណាចក្រ​កម្ពុជា​។ នេះ​គឺជា​កិត្តិយស​ជា​ប្រវត្តិសាស្ត្រ​មួយ​ទៀត ក្នុង​វិស័យ​កីឡា​ដែល​កម្ពុជា​រង់ចាំ​ធ្វើជា​ម្ចាស់ផ្ទះ​អស់​រយៈពេល ៦៤ ឆ្នាំ​មកហើយ ។

​សម្តេច​តេជោ​នាយករដ្ឋមន្ត្រី​បាន​សម្ដែង​នូវ​កោតសរសើរ​ចំពោះ​ក្រសួង​អប់រំ​យុវជន និង​កីឡា និង​គណៈកម្មាធិការ​អូឡាំពិក​កម្ពុជា ព្រមទាំង​ស្ថាប័ន​ពាក់ព័ន្ធ​ចំពោះ​កិច្ចសហប្រតិបត្តិការ​ល្អ និង​ការរួមសាមគ្គីគ្នា​រៀបចំ​ព្រឹត្តិការណ៍​ប្រកួត​កីឡា​ជាតិ​លើក​ទី​៣ និង​កីឡា​ជនពិការ​ជាតិ​លើក​ទី​១ នេះ ដែល​ការប្រកួត​បានចាប់ផ្តើម​នៅ​ថ្ងៃ​ទី​១៩ និង​ត្រូវ​បញ្ចប់​នៅ ថ្ងៃទី ៣០ ខែវិច្ឆិកា ២០២២ នេះ ។
​ព្រឹត្តិការណ៍​នៃ​ការប្រកួត​កីឡា​ជាតិ​នេះ មិន​ត្រឹមតែ​ជា​ព្រឹត្តិការណ៍​កីឡា​ជាតិ​មួយ​យ៉ាង​សំខាន់​សម្រាប់​កម្ពុជា​ប៉ុណ្ណោះ​ទេ ប៉ុន្តែ​ជា​ការ​បន្ត​កសាង សមត្ថភាព ទេពកោសល្យ និង​ជំនាញ​វិជ្ជាជីវៈ​របស់​កីឡាករ កីឡា​ការី​នី​កម្ពុជា ដើម្បី​ត្រៀម​ខ្លួន​ជាស្រេច​សម្រាប់​ការប្រកួត​កីឡា​ស៊ី​ហ្គេម និង​អាស៊ាន​ប៉ា​រ៉ា​ហ្គេម ឆ្នាំ ២០២៣ ខាងមុខនេះ ដែល​គិត​ត្រឹម​ថ្ងៃ​ទី ២១ ខែ វិច្ឆិកា​នេះ នៅសល់តែ ១៦៧ ថ្ងៃ​ប៉ុណ្ណោះ​។
​វិស័យ​កីឡា​ដើរតួនាទី​យ៉ាង​សំខាន់​ក្នុង​ការកសាង​ទំនាក់ ទំនង ការពង្រឹង​សាមគ្គីភាព និង​មិត្តភាព​ដែល​ព្រឹត្តិការណ៍​នេះ រួមចំណែក​ដល់​ការបង្កើន​មូលធន​សង្គម និង​ការសម្រេច បាន​សុខដុម​នីយកម្ម​ក្នុង​សង្គម​ជាតិ ។ ជាងនេះទៀត ព្រឹត្តិការណ៍​កីឡា​ផ្តល់​ឱកាស​ល្អ​សម្រាប់​ការផ្លាស់ប្តូរ​បច្ចេកទេស និង​បទពិសោធ ដែល​ជា​មរតក​វប្បធម៌​ជាតិ និង​ជា​សិល្បៈ​ការពារ​ខ្លួន​របស់​ប្រទេសជាតិ ព្រមទាំង​ជួយ​បំផុសស្មារតី​មហាជន​ឱ្យ​ស្រឡាញ់​គាំទ្រ​វិស័យ​កីឡា និង​លើកកម្ពស់​កិត្តិសព្ទ​កីឡា​របស់​ជាតិ​ឱ្យ​កាន់តែ​ល្បីល្បាញ​នៅលើ​ឆាក​អន្តរជាតិ ។​

​សម្តេច​តេ​ជោបាន​បន្តទៀ​ត​ថា កីឡា​រួមចំណែក​ដល់​ការពង្រឹង​រាងកាយ​ឱ្យ​មាន​ភាពរឹងមាំ និង​លើកកម្ពស់​សុខភាព​ល្អ​ដែល​ជា​ទ្រព្យសម្បត្តិ​ដ៏​ប្រពៃ និង​ជា​កត្តា​កំណត់​ដ៏​សំខាន់​នៃ​ផលិតភាព ពលកម្ម និង​ការកសាង​មូលធន​មនុស្ស​សម្រាប់​ដំណើរការ​អភិវឌ្ឍ​សេដ្ឋកិច្ច និង​សង្គមជាតិ ប្រកប​ដោយ​ភាព​ធន់ និង​ចីរភាព ។
​ប្រជាពលរដ្ឋ​ដែល​មាន​សុខភាព​ល្អ​រស់នៅ​ដោយ​សេចក្តី​រីករាយ ងាយ​ចាប់​យក​ចំណេះដឹង និង​បច្ចេកវិទ្យា​ថ្មីៗ ព្រមទាំង​មាន​ការ​តាំងចិត្ត និង​ក្ដីសង្ឃឹម​ខ្ពស់ ក្នុង​ការបង្កើន​ជំនាញ និង​មូលធន​មនុស្ស តាមរយៈ​ការសិក្សា​បន្ថែម​ពេញ​មួយ​ជីវិត ដើម្បី​ធ្វើ​បច្ចុប្បន្នភាព​ចំណេះដឹង និង​បច្ចេកវិទ្យា​ជាប្រចាំ សម្រាប់​រួមចំណែក​ដល់​ការផ្គត់ផ្គង់​កម្លាំង​ពលកម្ម​ដែល​មាន​គុណភាព និង​ផលិតភាព​ខ្ពស់ ។ វិស័យ​កីឡា​ពិតជា​ដើរតួ​សំខាន់​ក្នុង​ការពង្រឹង​សុខភាព​ផ្លូវកាយ​រឹងមាំ លើកកម្ពស់​សុខភាព​ផ្លូវចិត្ត បង្កើន​ផលិតភាព​ការងារ កាត់បន្ថយ​ភាព​តានតឹង​ក្នុង​អារម្មណ៍ លើកកម្ពស់​គុណភាព​ជីវិត និង​សុភមង្គល​ក្នុង​ក្រុម​គ្រួសារ ។​
​សម្តេច​តេជោ ហ៊ុន សែន សូម​លើក​ទឹកចិត្ត​ចំពោះ​ក្មួយៗ ចៅៗ កីឡាករ កីឡាការិនី​មាន​ពិការភាព ដែល​ត្រូវបាន​ក្រសួង​អប់រំ​យុវជន និង​កីឡា​បញ្ចូល​ក្នុង​កម្មវិធី​ប្រកួត​កីឡា​ជាតិ​ជនពិការ​លើក​ទី​១ ក្នុង​ឆ្នាំនេះ​។
​សូម​ខិតខំ​ប្រឹងប្រែង​បញ្ចេញ​សមត្ថភាព ឱ្យអស់​ពី​កម្លាំងកាយ​ចិត្ត និង​មាន​ភាពស្វាហាប់​ពោរពេញ​ដោយ​កម្លាំងចិត្ត​ខ្លាំងក្លា ដើម្បី​យកឈ្នះ​លើ​ពិការភាព​របស់​ក្មួយៗ​ចៅៗ សំដៅ​បង្ហាញ​នូវ​ការ​ពិត​ដែលថា “ ពិការភាព​ប្រកបដោយ​សមត្ថភាព​ខ្ពស់ ”​។​

​ឆ្លៀត​ក្នុង​ឱកាស​នេះ សម្តេច​សូម​ចូលរួម​កោតសរសើរ និង​អបអរសាទរ​ចំពោះ​កីឡាករ​-​កីឡា​ការិនី​ជនពិការ​ទាំងអស់ ដែល​បាន​ចូលរួម​ប្រកួត​កីឡា​អាស៊ាន​ប៉ា​រ៉ា​ហ្គេម​នៅ​ឥណ្ឌូនេស៊ី ដោយ​ទទួល​ជោគជ័យ​គួរ​ជាទី​មោទនៈ ។ ជោគជ័យ​របស់​ក្មួយៗ​ចៅៗ មិន​ត្រឹមតែ​ជា​មោទនភាព​របស់ ក្មួយៗ​ចៅៗ​ប៉ុណ្ណោះ​ទេ ប៉ុន្តែ​ជា​មោទនភាព​រួម​របស់​ប្រជាជន​កម្ពុជា និង​ប្រទេសជាតិ​យើងទាំងអស់គ្នា ក៏ដូចជា​ការលើក កម្ពស់​កិត្តិយស និង​កិត្យានុភាព​ជាតិ​យើង​នៅក្នុង​តំបន់ និង អន្តរជាតិ ។​

​សម្តេច​តេជោ ហ៊ុន សែន បាន​ផ្តល់​នូវ​ទស្សនៈ និង​ចំណុច​គន្លឹះ​មួយចំនួន​ដូច​ខាងក្រោម ៖
១-​សូម​លើក​ទឹកចិត្ត​ដល់​ក្មួយៗ​កីឡាករ​-​កីឡា​ការិនី ទាំងអស់ សូម​គោរព​តាម​បទបញ្ជា​នៃ​ការប្រកួត​កីឡា​ជាប្រចាំ ដើម្បី​លើកកម្ពស់​យុត្តិធម៌​ក្នុង​ការប្រកួត សេចក្តីថ្លៃថ្នូរ និង ក្រមសីលធម៌​វិជ្ជាជីវៈ​ក្នុង​ការប្រកួត ពីព្រោះថា កីឡា​មាន ស្តង់ដារ បទបញ្ជា​ត្រឹមត្រូវ​តែ​មួយ​ដែល​ផ្ទុយទៅនឹង​ការប្រកួតប្រជែង​ក្នុង​ផ្នែក​នយោបាយ ។
២-​សូម​អំពាវនាវ​ឱ្យ​បន្ត​ចូល​ចូលរួម​ក្នុង​យុទ្ធនាការ ផ្សព្វផ្សាយ ដើម្បី​រួមចំណែក​ដល់​យុទ្ធនាការ​ជាតិ​ស្ដីពី “​ប្រជាជន ម្នាក់​ត្រូវ​លេង​កីឡា​មួយ​មុខ​យ៉ាងតិច​ប្រចាំជីវិត​” “​ឆ្នាំ​២០២៣ ជា​ឆ្នាំ​ទស្សនា​កម្ពុជា​” “​រួមគ្នា​ដើម្បី​កម្ពុជា​ស្អាត និង​បដិ​សណ្ឋារ​- កិច្ច​ល្អ​” “​នាំគ្នា​កាត់បន្ថយ​គ្រោះថ្នាក់​ចរាចរណ៍ និង​ឥទ្ធិពល​គ្រឿងញៀន​” និង “​កីឡា​រស់នៅក្នុង​សន្តិភាព​” ។​
៣-​ក្រសួង​អប់រំ​យុវជន និង​កីឡា​ត្រូវ​បង្កើន​ការធ្វើ​ពិ​-​ពិធ​កម្ម​សកម្មភាព​កីឡា​ឱ្យ​កាន់តែច្រើន ដើម្បី​បង្កើន​ការលើកកម្ពស់​វិស័យ​កីឡា​កម្ពុជា និង​បង្កើន​ការ​ផ្សារភ្ជាប់​វិស័យ​កីឡា​ទៅនឹង​ការងារ​សង្គម ការដោះស្រាយ​បញ្ហា​សង្គម និង​ការ លើកកម្ពស់​សកម្មភាព​សេដ្ឋកិច្ច​ដោយហេតុថា កីឡា​ត្រូវបាន​ចាត់ទុកជា​ប្រភេទ​ទេសចរណ៍​បៃតង និង​ទទួលស្គាល់​ថា ជាការ ទូត​ដ៏​មាន​ប្រសិទ្ធភាព ដើម្បី​រួមចំណែក​ដល់​ការកសាង​មិត្តភាព សាមគ្គីភាព សុខសន្តិភាព​និង​សុខដុម​នីយកម្ម​ក្នុង​សង្គម​ជាតិ ។
៤-​គណៈកម្មាធិការ​ជាតិ​អូឡាំពិក​កម្ពុជា ជាពិសេស គណៈកម្មាធិការ​ជាតិ​រៀបចំ​ការប្រកួត​កីឡា​ស៊ី​ហ្គេម និង​អាស៊ាន ប៉ា​រ៉ា​ហ្គេម​ឆ្នាំ​២០២៣ ត្រូវ​បង្កើន​កិច្ចសហការ​ការបណ្ដុះបណ្ដាល និង​ការអភិវឌ្ឍ​កម្រិត​បច្ចេកទេស​កីឡា​ដល់​អត្ត​ពលិក​កម្ពុជា​ឱ្យបាន​ដល់​កម្រិត​ខ្ពស់​ដែល​អាច​ធ្វើទៅបាន ដើម្បី​ឱ្យ​អត្ត​ពលិក​កម្ពុជា​អាច​ចូលរួមកា​ន់តែ​ទូលំទូលាយ​ប្រកបដោយ​សមត្ថភាព ខ្ពស់ ក្នុង​ព្រឹត្តិការណ៍​នៃ​ការប្រកួត​កីឡា​ស៊ី​ហ្គេម និង​អាស៊ាន​ប៉ា​រ៉ា​ហ្គេម​ឆ្នាំ​២០២៣ និង​ព្រឹត្តិការណ៍​នៃ​ការប្រកួត​កីឡា​ជា​អន្តរជាតិ​នានា​នៅ​ថ្ងៃ​អនាគត​៕

Filed in: ព័ត៌មានជាតិ