ប្រកបដោយស្នាមញញឹមដ៏ស្និទ្ធស្នាល ក្នុងភារកិច្ចចូលរួម ការពារសន្តិសុខ សុវត្ថិភាព រក្សាសណ្តាប់ធ្នាប់ និងសង្គ្រោះបន្ទាន់ ក្នុងព្រះរាជពិធីបុណ្យអុំទូកបណ្តែតប្រទីប និងសំពះព្រះខែ អកអំបុក!តាមរយៈផេកផ្លូវការរបស់កងរាជអាវុធហត្ថរាជធានីភ្នំពេញ (Phnom Penh Gendarmerie) ដែកនាំដោយលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស ជាមេបញ្ជាការកងរាជអាវុធហត្ថរាជធានីភ្នំពេញ បានបង្ហោះនូវរូបភាពជាច្រើនសន្លឹក អមដោយខ្លឹមសារថា៖ ” អបអរសាទរ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៣!
បើទោះបីជាពុំបានឈប់សម្រាកដើរលេងកម្សាន្ត និងពុំបានទៅស្រុកកំណើតជួបជុំសាច់ញាតិ ដូចអ្នកដ៏ទៃ ប៉ុន្តែកងកម្លាំងអាវុធហត្ថរាជធានីភ្នំពេញ គ្រប់គ្នា នៅតែមានមោទកភាពនិងសប្បាយរីករាយ ចំពោះភារកិច្ចបម្រើប្រជាពលរដ្ឋ ក្នុងការចូលរួមជាមួយកម្លាំងចម្រុះ (ទាំង នគរបាល អាវុធហត្ថ និងយោធា ទាំងអាជ្ញាធរពាក់ព័ន្ធ) ការពារសន្តិសុខ សុវត្ថិភាព រក្សាសណ្តាប់ធ្នាប់ និងសង្គ្រោះបន្ទាន់ ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ជាមួយស្នាមញញឹមនិងភាពស្និទ្ធស្នាល ជាពិសេសពេលដែលបានឃើញទិដ្ឋភាពដ៏ច្រើនកុះករ របស់ប្រជាពលរដ្ឋមកពីតាមបណ្តាខេត្ត ក៏ដូចជាភ្ញៀវទេសចរណ៍បរទេស ដើរលេងកម្សាន្តយ៉ាងសប្បាយរីករាយ ក្រោមម្លប់សន្តិភាព គឺជាកម្លាំងចិត្តដ៏មហិមាសម្រាប់កងកម្លាំងសមត្ថកិច្ច គ្រប់ៗគ្នា។
– អរគុណសន្តិភាព!
– អរគុណ នយោបាយឈ្នះឈ្នះ!
– ដឹងគុណស្ថាបនិក មគ្គុទ្ទេសក៍ឯក និងប្រតិបត្តិករ
នយោបាយឈ្នះ ឈ្នះ ដែលនាំមកនូវ សន្តិភាពនិងការឯកភាពជាតិពេញលេញ! “
តាមរយៈរូបភាពប្រកបដោយវិន័យសណ្តាប់ធ្នាប់ ការទទួលខុសត្រូវ និងស្នាមញញឹមព្រមជាមួយកាយវិកាបង្ហាញនូវមនោសញ្ចេតនាស្និទ្ធស្នាល ទាំងនេះ បានបង្ហាញឲ្យឃើញច្បាស់ថា បើទោះបីជានឿយហត់ប៉ុណ្ណា លះបង់ពេលវេលាផ្ទាល់ខ្លួននិងពេលវេលាគ្រួសារយ៉ាងណា ក៏សមត្ថកិច្ចអាវុធហត្ថរាជធានីភ្នំពេញគ្រប់គ្នានៅតែ មានមោទកភាពនិងភាពសប្បាយរីករាយយ៉ាងពិតប្រាកដ លើសពីនេះទៅទៀត សំណេរនិងរូបភាពទាំងនេះ ក៏បានបង្ហាញឲ្យឃើញ នូវតថភាពសង្គមជាក់ស្តែងដែលមិនអាចក្រឡៃបាន ស្តីពីការរីកចម្រើនរបស់ប្រទេសជាតិនិងសុខដុមរមនាក្នុងជីវភាពរស់នៅរបស់ប្រជាពលរដ្ឋក្រោមម្លប់សន្តិភាពយ៉ាងពិតប្រាកដូចគ្នាផងដែរ៕
