ភ្នំពេញ៖ ក្រុមការងារផ្នែករដ្ឋបាលជលផលស្ទឹងស្លូត សហការជាមួយគណៈបញ្ជាការឯកភាពស្រុកពាមរក៍ ចុះធ្វើការស្រាវជ្រាវ ត្រួតពិនិត្យ និងទប់ស្កាត់បទល្មើសជលផល បានមួយករណីដោយធ្វើការរុះរើ និងបំផ្លាញចោលលូស្បៃមុង ចំនួន១៦មាត់ របាំងព្រួលស្បៃមុង ប្រវែង ៩២០ ម៉ែត្រ បង្គោលចម្រឺងចំនួន ៤២០ ដើម និងបានចាក់លែងកូនត្រីចម្រុះចូលបឹងធម្មជាតិវិញចំនួន ៧០ គីឡូក្រាម។
លោក អូន ស៊ីណាត នាយខណ្ឌរដ្ឋបាលជលផលព្រៃវែង បានប្រាប់ឱ្យរស្មីកម្ពុជាដឹង នៅល្ងាចថ្ងៃទី១៨ ខែកញ្ញា ឆ្នាំ២០២៣ថាៈ ក្រុមការងារផ្នែករដ្ឋបាលជលផលស្ទឹងស្លូត បានដឹកនាំកម្លាំងក្រោមឱវាទ សហការជាមួយគណៈបញ្ជាការឯកភាពស្រុកពាមរក៍ នៅថ្ងៃទី១៨ ខែកញ្ញា បានចុះធ្វើការត្រួតពិនិត្យ និងទប់ស្កាត់បទល្មើលជលផល បានមួយករណីនៅចំណុចទួលដើមស្វាយ ភូមិចំការវែង ឃុំពាមមានជ័យ ស្រុកពាមរក៍ ខេត្តព្រៃវែងដោយក្រុមការងារសម្រេចធ្វើការរុះរើ និងបំផ្លាញចោលវត្ថុតាងនៅនឹងកន្លែង។
នាយខណ្ឌរដ្ឋបាលជលផល ខាងលើ បានបញ្ជាក់ថាៈ វត្ថុតាងដែលត្រូវបានរុះរើ និងបំផ្លាញចោល រួមមាន លូស្បៃមុង ១៦មាត់ របាំងស្បៃមុង ៩២០ ម៉ែត្រ បង្គោលចម្រឹង ៤២០ ដើមនិងចាក់លែងកូនត្រីចម្រុះចូលបឹងធម្មជាតិវិញចំនួន ៧០គីឡូក្រាម៕
