កំពង់ឆ្នាំងៈ ពិធីបុណ្យបញ្ចុះបឋមសិលាកសាងកុដិ និងដង្ហែ អង្គផ្កាប្រាក់សាមគ្គី ប្រគេនព្រះសង្ឃ គង់ចាំព្រះវស្សា នៅវត្តវារីផាសុខារាម ហៅវត្តទឹកជុំ ស្ថិតក្នុងភូមិទឹកជុំ ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង ដើម្បីប្រមូលបច្ច័យកសាង សមិទ្ធផលនានា នៅក្នុងវត្តនេះ រដ្ឋបាលខេត្តកំពង់ឆ្នាំង គ្រោងនឹងប្រព្រឹត្តទៅ នៅថ្ងៃទី២៦ ខែសីហា ឆ្នាំ២០២៣ ខាងមុខ ។
ការសម្រេចអនុវត្តតាមការគ្រោងទុកនេះ បន្ទាប់ពីលោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង នៅរសៀលថ្ងៃទី២៤ ខែសីហា ឆ្នាំ២០២៣ បានចុះពិនិត្យមើលទីតាំង ដើម្បីត្រៀមរៀបចំប្រារព្ធពិធីនេះ។
លោក ស៊ុន សុវណ្ណារិទ្ធិ បានមានប្រសាសន៍ផ្តាំផ្ញើ ដល់អង្គភាពពាក់ព័ន្ធ និង ប្រគេនព្រះចៅអធិការវត្ត និងអាជ្ញាធរមូលដ្ឋានពាក់ព័ន្ធ ធ្វើយ៉ាងណា ត្រូវរៀបចំបរិស្ថាន សោភ័ណភាព តាមដងផ្លូវ ក្នុងបរិវេណវត្ត ឱ្យបានល្អ។ អនុគណៈកម្មការសមាសភាព និងរៀបចំត្រូវរៀបចំកម្មវិធីឱ្យតាមលំដាប់លំដោយ នៃប្រពៃណី ព្រះពុទ្ធសាសនា។ ជាពិសេស សមត្ថកិច្ចគ្រប់លំដាប់ថ្នាក់ ត្រូវរៀបចំសន្តិសុខ សណ្តាប់ធ្នាប់ ឱ្យបានល្អ តាំងពីពេលចាប់ផ្តើម រហូតដល់ចប់ពិធីបុណ្យ ឱ្យប្រព្រឹត្តទៅដោយរលូន៕
