(កំពង់ស្ពឺ)៖ នាយឧត្តមសេនីយ៍ ឥត សារ៉ាត់ អគ្គមេបញ្ជាការរងនាយសេនាធិការចម្រុះ នៃកងយោធពលខេមរភូមិន្ទ នៅថ្ងៃទី០៨ ខែកុម្ភៈ ឆ្នាំ២០២៣នេះ បានអញ្ជើញជួបសំណេះសំណាលបំពាក់ឋានន្តរស័ក្តិ ប្រគល់សេចក្តី ប្រកាសផ្លាស់ប្ដូរ តែងតាំងមុខងារ ជូននាយទាហានជានាយ នាយរង ការិយាល័យរបស់សាលានាយទាហានសកម្ម និងបិទវគ្គបំប៉នគោរពកោសល្យយោធាចារ្យផ្ទៃក្នុងឆ្នាំ២០២២ នៅព្រឹកថ្ងៃទី០៨ ខែកុម្ភៈ ឆ្នាំ២០២៣នេះ។
នាឱកាសនោះ នាយឧត្តមសេនីយ៍ ឥត សារ៉ាត់ បានបញ្ជាក់ទៅកាន់នាយទាហានដែលជាសិក្ខាកាមក្នុងវគ្គបំប៉នគរុកោសល្យយោធាចារ្យ ផ្ទៃក្នុងឆ្នាំ២០២២ថានេះ គឺជាមោទនភាពរបស់ជាតិ និងកងយោធពលខេមរភូមិន្ទ ដែលមានយោធិនជាយោធាចារ្យមានគរុកោសល្យខ្ពស់សម្រាប់វិស័យបណ្ដុះបណ្ដាលធនធានមនុស្សបន្ថែមទៀត សម្រាប់បន្តវេនបម្រើឱ្យវិស័យការពារជាតិ ពីព្រោះថាកងទ័ព គឺជាធនធានមនុស្ស ដែលប្រកបដោយមនសិកា ស្នេហាជាតិ សាសនា ព្រះមហាក្សត្រ និងមានការប្តេជ្ញាចិត្ត ប្ដូរផ្ដាច់ការពារអធិបតេយ្យ បូរណភាពទឹកដី ព្រមទាំងមានសេចក្តីថ្លៃថ្នូរ សីលធម៌ មនុស្សធម៌ គុណធម៌ ជាមួយនឹងការត្រៀមខ្លួន បូជាលះបង់គ្រប់បែបយ៉ាងដើម្បីបុព្វហេតុជាតិមាតុភូមិ ទោះស្ថិតក្នុងកាលៈទេសៈណាក៏ដោយ។
នាយឧត្តមសេនីយ៍ ឥត សារ៉ាត់ បានបញ្ជាក់ថា ជាជំហានថ្មីមួយទៀតនៃចក្ខុវិស័យ គោលនយោបាយការពារជាតិ គឺការកំណត់យកទិសដៅនៃការធ្វើទំនើបកម្មក្នុងកងទ័ព ហើយដំណើរការនៃទំនើបកម្មនេះនឹងក្លាយទៅជាផ្នែកមួយដ៏សំខាន់បន្ថែមទៀត នៃកិច្ចការកែទម្រង់កងទ័ព ដែលបាននឹងកំពុងអនុវត្តដោយសម្រេចបាននៅសមិទ្ធផលជាច្រើនរួចមកហើយ រហូតមកដល់បច្ចុប្បន្ននេះ។ ដូច្នេះ ទាំងយោធាចារ្យ និងសិក្ខាកាមត្រូវខិតខំបន្តសិក្សាស្រាវជ្រាវ ដុសខាត់ចំណេះដឹងឱ្យបានជាប់ជាប្រចាំដើម្បីទទួលរ៉ាប់រងរាល់ភារកិច្ចរបស់កងយោធពលខេមរភូមិន្ទទាំងក្នុងពេលចំពោះមុខ និងតទៅអនាគត។
នាយឧត្តមសេនីយ៍ បានឱ្យដឹងថា ខណៈពេលដែលបញ្ហាប្រឈម និងការគំរាមកំហែងទាំងឡាយមានលក្ខណៈកាន់តែស្មុគស្មាញ និងគ្រោះថ្នាក់ទាំងបញ្ហាសន្តិសុខបែបប្រពៃណី ដូចជាការប្រយុទ្ធរវាងកម្លាំងទល់នឹងកម្លាំង និងបែបមិនប្រពៃណីជាការវាយប្រហារដោយប្រើប្រាស់ប្រព័ន្ធអ៉ីនធឺរណេត និងបច្ចេកវិទ្យាទំនើប បញ្ហាគ្រោះមហន្តរាយ និងជំងឺរាតត្បាតជាដើម។
នាយឧត្តមសេនីយ៍ ឥត សារ៉ាត់ បានលើកឡើងថា ក្រោមម្លប់សន្តិភាពនៃនយោបាយឈ្នះ-ឈ្នះ ដែលមានសម្ដេចតេជោ ហ៊ុន សែន ជានាយករដ្ឋមន្ត្រី និងជាជាស្ថាបនិក កត្តាសន្តិភាព ឯកភាពជាតិ ឯកភាពទឹកដី ស្ថេរភាពនយោបាយ និងការរីកចម្រើនផ្នែកសង្គមសេដ្ឋកិច្ចដូចពេលបច្ចុប្បន្ន គឺជាដំណាក់កាលដ៏សុខសាន្តមួយ ដែលកើតមានដោយកម្រនៅក្នុងប្រវត្តិសាស្ត្រកម្ពុជា។
នាយឧត្តមសេនីយ៍ បានបន្ថែមថា៖ «សន្តិភាពសំដៅដល់បរិយាកាសគ្របដណ្ដប់ក្រោមម្លប់ឯកភាពជាតិ និងបូរណភាពទឹកដី ការផ្ដល់នូវសិទ្ធិអំណាច សេរីភាព ដល់ប្រជាពលរដ្ឋ ក្នុងការរស់រានមានជីវិត ទទួលបានការអប់រំ និងការប្រកបរបរទទួលទានដោយសេចក្តីសុខសាន្ត គ្មានការព្រួយបារម្ភ ឬភ័យខ្លាចអំពីអំពើអសន្តិសុខ និងសង្គ្រាម។ ទាំងនេះ គឺជាសិទ្ធិអំណាច និងក៏ជាសុភមង្គលដែលប្រជាជនកម្ពុជា ស្រេកឃ្លានទន្ទឹងសុបិន្តចង់បានអស់រយៈពេលជាង ៥០០ឆ្នាំមកហើយ។ ដូច្នេះ យើងទាំងអស់គ្នាត្រូវតែបន្តខិតខំរួបរួមគ្នាថែរក្សានៅអំណោយពរជ័យដ៏ឧត្តុង្គឧត្តមថ្លៃថ្លានេះ ឱ្យបានគង់វង្សយូរអង្វែងតទៅមុខទៀត»។
នាយឧត្តមសេនីយ៍ ឥត សារ៉ាត់ បញ្ជាក់បន្ថែមថា បច្ចុប្បន្ននេះ ការងារហ្វឹកហ្វឺនបានដើរតួនាទីជាយុទ្ធសាស្ត្រយ៉ាងសំខាន់ក្នុងការពង្រឹងខឿនការពារជាតិតាមរយៈការផ្តល់នូវចំណេះដឹង និងចំណេះធ្វើ ពិតប្រាកដឱ្យដល់កងទ័ព ជាពិសេសយោធិនដែលមានវ័យក្មេង ដែលជាអ្នកបន្តវេនជំនាន់ក្រោយ។ ក្នុងស្មារតីនេះការងារហ្វឹកហ្វឺនត្រូវបានចាត់ទុកជាការងារអាទិភាពចាំបាច់បំផុត ដែលត្រូវដំណើរការបន្តបន្ទាប់ជាប្រចាំដូចភ្លៀងរលឹម ដើម្បីចូលរួមចំណែកអនុវត្តយុទ្ធសាស្ត្រការពារជាតិ និងគោលនយោបាយរបស់រាជរដ្ឋាភិបាលឱ្យទទួលបានជោគជ័យ។
នាយឧត្តមសេនីយ៍ ឥត សារ៉ាត់ ក៏បានផ្តាំផ្ញើដល់នាយទាហានជាសិក្ខាកាម ត្រូវបញ្ចប់វគ្គបំប៉នគរុកោសល្យយោធាចារ្យផ្ទៃក្នុង និងនាយទាហានជាន់ខ្ពស់ដែលត្រូវបានតម្លើងឋានន្តរសក្តិ និងប្រកាសផ្លាស់ប្ដូរ តែងតាំងមុខងារថ្មីទាំងអស់ ត្រូវបន្តយកចិត្តទុកដាក់ ខិតខំតស៊ូ អនុវត្តការងារឱ្យបានកាន់តែល្អ និងត្រូវព្យាយាមប្រឹងប្រែងហ្វឹកហ្វឺនហាត់ពុតលត់ដំខ្លួន នៅទីនេះ នឹងពេលវិលត្រឡប់ទៅតាមបណ្ដាកងឯកភាពឱ្យបានកាន់តែប្រសើរ ដើម្បីពេលអនាគត់អស់លោកមានសមត្ថភាពគ្រប់គ្រាន់ ក្លាយជាថ្នាក់ដឹកនាំ ក្លាយជានាយទាហានប្រកបដោយសមត្ថភាព ក្នុងការចូលរួមបម្រើឱ្យបុព្វហេតុការពារជាតិមាតុភូមិបានរឹងមាំ ពិសេសត្រូវគោរព និងអនុវត្តឱ្យបានម៉ឺងម៉ាត់នូវបទបញ្ជារបស់ប្រមុខរាជរដ្ឋាភិបាល ថ្នាក់ដឹកនាំក្រសួងការពារជាតិ អគ្គមេបញ្ជាការនៃកងយោធពលខេមរភូមិន្ទ។
ឧត្តមសេនីយ៍ឯក ប៊ុត សុភាព នាយកសាលានាយទាហានសកម្ម បានឱ្យដឹងថា វគ្គបំប៉នគរុកោសល្យយោធាចារ្យផ្ទៃក្នុងឆ្នាំ២០២២ ដែលត្រូវបញ្ចប់មានសិក្ខាកាមជាយោធាចារ្យក្នុងសាលាចំនួន ៥០នាក់ ដោយប្រើរយពេលរៀសូត្រ ៣ខែ លើខ្លឹមសារមេរៀន អប់រំ និងគោរពកុសល្យ, វិទ្យាសាស្ត្រយោធា និងសិក្សាតាមជំនាញ ៤មុខវិជ្ជា ក្រោយបញ្ចប់វគ្គសិក្ខាកាមគរុកោសល្យយោធាចារ្យទាំង ៥០នាក់ ទទួលនិទ្ទេសល្អ ១០០%។
ដោយឡែកនាយទាហាន នាយទាហានរង ដែលជាយោធាចារ្យចំនួន ៤២នាក់ ដែលត្រូវបានដំឡើងឋានន្តរសក្តិ, និងត្រូវបានផ្លាស់ប្ដូរ តែងតាំងមុខងារជានាយ នាយរងការិយាល័យរបស់សាលានាយទាហានសកម្ម រួមមាន៖ ថ្នាក់វរសេនីយ៍ឯក ១នាក់, ថ្នាក់វរសេនីយ៍ទោ ៣នាក់, ថ្នាក់វរសេនីយ៍ត្រី ៧នាក់, ថ្នាក់អនុសេនីយ៍ឯក ២នាក់, ថ្នាក់អនុសេនីយ៍ទោ ១៥នាក់ និងប្រកាសតែងតាំង ផ្លាស់ប្ដូរមុខងារចំនួន ១៤រូបផងដែរ៕
