កាលពីថ្ងៃទី ៣០ ខែមករា ឆ្នាំ ២០២៣ អធិការដ្ឋាននគរបាលស្រុកពួកឃាត់ខ្លួនជនសង្ស័យចំនួន ៤ នាក់
ពាក់ព័ន្ធក្នុងបទល្មើស និងសមគំនិត ករណីហិង្សាដោយចេតនា បណ្តាលអោយយុវជនម្នាក់ទៀតពិការមួយជីវិត ដែលបង្កឡើង កាលថ្ងៃទី២៩ ខែមករា ឆ្នាំ២០២៣ ។
របាយការណ៍អោយដឹងថា នៅវេលាម៉ោង ២២និង៣០នាទី ថ្ងៃទី២៩ ខែមករា ឆ្នាំ២០២៣ មានសង្ស័យមិនស្គាល់អត្តសញ្ញាណ ចំនួន ២ នាក់ ជិះម៉ូតូ ១គ្រឿង ធ្វើសកម្មភាពកាប់ទៅលើជនរងគ្រោះឈ្មោះ ណែម នង់ ភេទប្រុស ២១ឆ្នាំ ត្រង់ចំណុចផ្លូវកៅស៊ូ ស្ថិតភូមិក្អែកទំ ឃុំរើល ស្រុកពួក ខេត្តសៀមរាប បណ្តាលឲ្យជនរងគ្រោះរងរបួសដាច់ម្រាមដៃចំនួន ១ (ចង្អុលដៃខាងធ្វេង) ក្រោយធ្វើកម្មភាព ជនសង្ស័យបានបើកម៉ូតូគេចខ្លួនបាត់ ចំណែកជនរងគ្រោះបានទៅមន្ទីរពេទ្យ លុះដល់រសៀលថ្ងៃទី៣០ ខែមករា ឆ្នាំ២០២៣ ទើបមកដាក់បណ្តឹងនៅប៉ុស្តិ៍នគរបាលរដ្ឋរើល។
បន្ទាប់ពីទទួលបានពាក្យបណ្តឹងពីជនរងគ្រោះ សមត្ថកិច្ចក៏បានកំណត់មុខសញ្ញាជនសង្ស័យ រួមមាន ៖
១.ឈ្មោះ ណី បូណា ភេទប្រុស អាយុ ១៨ឆ្នាំ មុខរបរ កម្មករ
២.ឈ្មោះ វ៉ា ធា ភេទប្រុស អាយុ ១៧ឆ្នាំ មុខរបរ កម្មករ អ្នកទាំងពីរកើតនៅភូមិត្រពាំងឬស្សី ឃុំរើល ស្រុកពួក ខេត្តសៀមរាប ទីលំនៅបច្ចុប្បន្នភូមិត្រពាំងឬស្សី ឃុំរើល ស្រុកពួក ខេត្តសៀមរាប។
៣.ឈ្មោះ ណាត ឆានុន ភេទប្រុស អាយុ ១៨ឆ្នាំ មុខរបរ កម្មករ
៤.ឈ្មោះ ឡេ លីម ហៅពុយ ភេទប្រុស អាយុ ២២ឆ្នាំ មុខរបរ កម្មករ អ្នកទាំងពីរកើតនៅភូមិព្រលឹត ឃុំរើល ស្រុកពួក ខេត្តសៀមរាប ទីលំនៅបច្ចុប្បន្នភូមិព្រលឹត ឃុំរើល ស្រុកពួក ខេត្តសៀមរាប ។
ជនសង្ស័យទាំង ៤ រូបនេះជាប់ពាក់ព័ន្ធក្នុងបទល្មើសករណីហិង្សា ដោយចេតនាមានស្ថាន ទម្ងន់ទោសបណ្តាលឲ្យពិការភាពជាអចិន្ត្រៃយ៍ និងសមគំនិតក្នុងករណីហិង្សា ដោយចេតនាមានស្ថាន ទម្ងន់ទោសបណ្តាលឲ្យពិការភាពជាអចិន្ត្រៃយ៍ កើតហេតុកាលពីវេលាម៉ោង ២២និ000ង៣០នាទី ថ្ងៃទី២៩ ខែមករា ឆ្នាំ២០២៣ ចំណុចផ្លូវកៅស៊ូ ស្ថិតភូមិក្អែកទំ ឃុំរើល ស្រុកពួក ខេត្តសៀមរាប។
តាមការស្តាប់ចម្លើយឈ្មោះ វ៉ា ធា ភេទប្រុស អាយុ ១៧ឆ្នាំ បានសារភាពថា៖ នៅយប់កើតហេតុ រូបគេបានប្រើឧបាយកលទូរស័ព្ទណាត់ជនរងគ្រោះទៅលេងនៅក្នុងកម្មវិធីបុណ្យនៅក្នុងវត្តរើក ស្ថិតនៅរើល ឃុំរើល ពេលជនរងគ្រោះបើកម៉ូតូទៅដល់ឃ្លោងទ្វាវត្តរើល រូបគេបានទូរស័ព្ទឲ្យជនរងគ្រោះឡប់ ក្រោយមកចំណុចស្ពានជាប់ផ្លូវកៅស៊ូ ស្ថិតភូមិក្អែកទំ ឃុំរើល ស្រុកពួក ដោយកុហក់ថា រូបគេកំពុងរងចាំនៅទៅ ហើយឲ្យឈ្មោះ ណី បូណា បើកម៉ូតូឌុប ឈ្មោះ ឆាត ឆានុន ទៅកាប់លើជនរងគ្រោះតែម្តង។
តាមការស្តាប់ចម្លើយឈ្មោះ ឡេ លីម ហៅពុយ ភេទប្រុស អាយុ ២២ឆ្នាំ បានសារភាពថា៖ ខ្លួនជាមុខសញ្ញាចាស់ក្នុងបទល្មើសគ្រឿងញៀន និងករណីប៉ុនប៉ងរំលោភសេពសន្ថវៈ កាលថ្ងៃទី១៧ ខែឧសភា ឆ្នាំ២០២២ចំណុចភូមិត្រពាំងស្វាយ ឃុំរើល ស្រុកពួក។ ចំពោះករណីខាងលើនេះរូបខ្លួនក៏បានចូលរួមរៀបគំរងដើម្បីកាប់ទៅលើជនរងគ្រោះផងដែរ តែពេលនោះខ្លួនពុំមានម៉ូតូជិះទើបមិនបានរួមកាប់ តែខ្លួននៅជាមួយឈ្មោះ វ៉ា ធា រងចាំដំណឹងពីឈ្មោះ ណី បូណា និងឈ្មោះ ណាត ឆានុន ។
តាមការស្តាប់ចម្លើយឈ្មោះ ណី បូណា ភេទប្រុស អាយុ ១៨ឆ្នាំ និងឈ្មោះ ណាត ឆានុន ភេទប្រុស អាយុ ១៨ឆ្នាំ បានសារភាពស្រដៀងគ្នាថា៖ នៅយប់ថ្ងៃទី២៨ ខែមករា ឆ្នាំ២០២២ ក្រុមជនរងគ្រោះបានធ្វើសកម្មភាពវាយមកលើក្រុមរបស់ខ្លួននៅក្នុងបរិវេណវត្តព្រលឹត ភូមិព្រលឹត ឃុំរើល ក្រោយពេលវាយក្រុមរបស់ខ្លួនហើយឈ្មោះ ណែម នង់ តែងតែដើរអួតរឿងកាប់ចាក់ និងបោះសម្តីមកក្រុមខ្លួនថា “ចង់កាប់មួយស្មើក៏បាន ឬកាប់ពីរទល់និងមួយក៏បាន រូបគេរង់ចាំជានិច្ច”។ ដោយមានគំនុំក្នុងរឿងចាស់ ពួកខ្លួនបានឲ្យឈ្មោះ វ៉ា ធា ខលតាមឆាតណាត់ឈ្មោះ ណែម នង់ កុហក់ថាទៅដើរលេងទៅវត្តរើល ដោយឈ្មោះ ណី បូណា ជាអ្នកបើកម៉ូតូឌុបឈ្មោះ ណាត ឆានុន ប្រដាប់ដោយដាវចំនួន ១ដើម ស្ទាក់ចាំកាប់ទៅលើជនរងគ្រោះនៅកន្លែងកើតហេតុខាងលើ។ បន្ទាប់ពីធ្វើសកម្មភាពកាប់ទៅលើជនរងគ្រោះរួចហើយឈ្មោះ ណាត ឆានុន ទូរស័ព្ទប្រាប់ទៅឈ្មោះ វ៉ា ធា ថាធ្វើការបានសម្រេចហើយ។
វត្ថុតាងដកហូតបាន៖ ដាវចំនួន ១ ដើម ប្រវែង ៧០ សង់ទីម៉ែត្រ មុខកាត់ ៦ សង់ទីម៉ែត្រ, ទូរស័ព្ទចំនួន ៤ គ្រឿ (ម៉ាក Realme ពណ៌ក្រហម ផ្ទុកស៊ីកាតលេខ ០៩៧ ៦៤៣៨៣៩០, ម៉ាក Oppo ពណ៌ខ្មៅ លាយក្រហម ផ្ទុកស៊ីកាតលេខ ០៨៨ ៦៨៥៥៤០៣, ម៉ាក iPhone 7plus ពណ៌ខ្មៅ ផ្ទុកស៊ីកាតលេខ ០៩៧ ៣៥៣៣០៥៩, ម៉ាក vivo ព័ណ៌ផ្ទៃមេឃ ផ្ទុកស៊ីកាតលេខ ០៦៧៩៣៨៧៧១) របស់ជនសង្ស័យប្រើសម្រាប់ខល និងឆាត់ណាត់គ្នាដើម្បីធ្វើសកម្មភាព៕
