ខេត្ដស្វាយរៀង៖ នៅព្រឹកថ្ងៃសុក្រ ទី១៦ ខែធ្នូ ឆ្នាំ២០២២ លោកឧត្តមសេនីយ៍ត្រី នុត នន្ទ មេបញ្ជាការរងតំណាងលោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀង និងលោកធឹម ណាត ប្រធានក្រុមប្រឹក្សាស្រុករំដួល លោកហែម សុីណា អភិបាលនៃគណៈអភិបាលស្រុករំដួល បានអញ្ជើញជាអធិបតីភាពក្នុងពិធីប្រកាសតែងតាំងផ្លាស់ប្ដូរមុខតំណែងលោកវរសេនីយ៍ត្រី វ៉ន សុខា ជាមេបញ្ជាការមូលដ្ឋានកងរាជអាវុធហត្ថស្រុករំដួល ជំនួសលោកវរសេនីយ៍ត្រី ឌុយ សុីចាន់ ដែលត្រូវទទួលបានមុខតំណែងថ្មី។
ក្នុងពិធីនេះមានការអញ្ជើញចូលរួមពី លោក លោកស្រីមេបញ្ជាការរង លោកនាយសេនាធិការ លោកប្រធានមន្ទីរទាំង០៧ លោក លោកស្រីនាយការិយាល័យ លោកមេបញ្ជាការមូលដ្ឋានកងរាជអាវុធហត្ថក្រុង-ស្រុកទាំង០៧ លោកអធិការនគរបាលស្រុក រំដួល លោកមេបញ្ជាការផ្នែកសឹករងស្រុករំដួល លោកមេបញ្ជាការវរ:សេនាតូចលេខ៦១១នគរបាលការពារព្រំដែន លោកមេឃុំទាំង ១០ឃុំ លោកនាយប៉ុស្តិ៍នគរបាលរដ្ឋបាលទាំង១០ប៉ុស្តិ៍ និងលោក លោកស្រីតំណាងអង្គភាព ស្ថាប័ននានាជាច្រើនរូបផងដែរ។
លោក ហែម ស៊ីណា អភិបាល នៃគណៈអភិបាលស្រុករំដួល បានថ្លែងកោតសរសើរដល់កងរាជអាវុធហត្ថស្រុករំដួល ដែលរយៈពេលកន្លងមកបានចូលរួមបង្ក្រាបបទល្មើស និងបានសហការជាមួយកម្លាំងនគរបាល និងយោធាស្រុក បានល្អប្រសើរផងដែរ។
លោកក៏បានសំណូមពរដល់កងកម្លាំងប្រដាប់អាវុធទាំងបីក្នុងស្រុក ត្រូវការពាររាជរដ្ឋាភិបាលស្របច្បាប់ ដែលកើតឡើងដោយការបោះឆ្នោត ហើយត្រូវតែប្រឆាំងដាច់ខាត ចំពោះក្រុមអគតិមួយចំនួនដែលចង់ផ្តួលរំលំ រាជរដ្ឋាភិបាលស្របច្បាប់ និងចង់បំផ្លាញជាតិឯង ដែលប្រជាពលរដ្ឋសព្វថ្ងៃនេះ កំពុងរីករាយនិងសន្តិភាព និងប្រកបការងារដោយសុខដុមរមនា ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឱ្យមូលដ្ឋានមានការរីកចម្រើនលើគ្រប់វិស័យ។
លោកឧត្តមសេនីយ៍ត្រី នុត នន្ទ មេបញ្ជាការរងកងរាជអាវុធហត្ថខេត្តស្វាយរៀង លោកបានថ្លែងអំណរគុណដល់កងកម្លាំងកងរាជអាវុធហត្ថស្រុករំដួល ដែលបានការពារសន្តិសុខសណ្តាប់ធ្នាប់បានល្អ និងបានរួមចំណែកសហការអនុវត្តគោលនយោបាយ ភូមិ-ឃុំ មានសុវត្ថិភាពជូនប្រជាពលរដ្ឋ នៅក្នងមូលដ្ឋានបានល្អប្រសើរ។ លោកឧត្តមសេនីយ៍ត្រីមេបញ្ជាការរងកងរាជអាវុធហត្ថខេត្តបានមានប្រសាសន៍ផ្តាំផ្ញើនិងណែនាំដូចខាងក្រោម៖ ធ្វើជាអ្នកដឹកនាំគ្រប់គ្រង
អង្គភាព ក្នុងនាមមេបញ្ជាការ ត្រូវគិតនូវ គោលការណ៍០៨យ៉ាងគឺ ៖
១. ការហូបចុករបស់ថ្នាក់ក្រោម
២. ការស្នាក់នៅ
៣. ការស្លៀកពាក់
៤. ការថែរក្សាសុខភាព និងព្យាបាល
៥. ពង្រឹងសមត្ថភាព
៦. ផ្ដល់លទ្ធភាពដល់ថ្នាក់ក្រោមឱ្យមានជីវភាពល្អប្រសើរ
៧. សរសើរ លើកទឹកចិត្ត ដល់ថ្នាក់ក្រោម និងមានកម្មវិធីជួបជុំ
៨. ត្រូវយកចិត្តទុកដាក់ដល់នាយ នាយរងកងរាជអាវុធហត្ថក្នុងមូលដ្ឋាន ដែលត្រូវបានចូលនិវត្តន៍ ដែលមានជីវភាពខ្វះខាត។
លោកឧត្តមសេនីយ៍ត្រី មេបញ្ជាការរងកងរាជអាវុធហត្ថខេត្តក៏បានមានប្រសាសន៍បន្តទៀតថា កងរាជអាវុធហត្ថត្រូវមានចំណេះដឹងពិសេសចេះប្រើប្រាស់បណ្តាញទំនាក់ទំនងសង្គមនិងប្រព័ន្ធបច្ចេកវិទ្យា ត្រូវចូលរួមជួយគិត ជួយធ្វើ រួមគ្នាទទួលខុសត្រូវ និងសូមឱ្យលោកមេបញ្ជាការ ដែលទើបប្រកាសចូលកាន់មុខតំណែងថ្មីនាពេលនេះ ត្រូវចេះសាមគ្គីភាព ឯកភាពផ្ទៃក្នុង និងត្រូវសហការគ្រប់បណ្តាអង្គភាពពាក់ព័ន្ធពិសេសគណ:បញ្ជាការឯកភាពរដ្ឋបាលស្រុក ៕
