ខេត្តកែប ៖ កសិដ្ឋាន SV Ranch Cambodia ស្ថិតនៅភូមិចំការបី ឃុំពង់ទឹក ស្រុកដំណាក់ចង្អើរ កំពុងរួមចំណែកក្នុងការលើកកម្ពស់វិស័យកសិកម្ម លើកការចិញ្ចឹម និងបង្កាត់ ពូជសត្វគោប្រាម៉ាន់ និងសេះប្រណាំង។ កសិដ្ឋាននេះ ក៏បើកឲ្យភ្ញៀវទេសចរចូលកម្សាន្ត និងស្នាក់នៅផងដែរ។បើតាមការបញ្ជាក់របស់កសិកដ្ឋាន និងមន្ត្រីទេសចរណ៍ ថាកន្លែងនេះនឹងផ្តល់បទពិសោធថ្មីមួយសម្រាប់ភ្ញៀវទេសចរមកកម្សាន្តខេត្តកែប។
សហស្ថាបនិកកសិដ្ឋាន SV Ranch Cambodia បានប្រាប់ឲ្យដឹងថា គោលបំណង់ និងចក្ខុវិស័យ ក្នុងការបង្កើតកសិដ្ឋានលើផ្ទៃដីជាង២០ហិកតានៅតំបន់ភ្នំវល្លិ៍នេះ ព្រោះយល់ឃើញថា តំបន់នេះមានសក្តានុពលខ្លាំង ពិសេសលើវិស័យទេសចរណ៍ ហើយក្រុមការងារលោក នឹងធ្វើឲ្យកសិដ្ឋាននេះ ក្លាយទៅជាតំបន់កសិ -ទេសចរណ៍ថ្មីមួយបន្ថែមទៀត នៅលើទឹកដីដ៏ស្រស់បំព្រង នៃតំបន់ភ្នំវល្លិ៍ ខេត្តកែប។ ជាងនេះទៅទៀតកសិដ្ឋានក៏មានគំនិតជួយលើកកម្ពស់ដល់វិស័យកម្ម លើកការចិញ្ចឹម និងបង្កាត់ពូជគោប្រាម៉ាន និងសេះប្រណាំង ដើម្បីចែកចាយឲ្យទៅប្រជាពលរដ្ឋមានលទ្ធភាពអាចចីញ្ចឹមពូជគោ និងសេះល្បីៗនៅលើពិភពលោក។
បុគ្គលិកជំនាញមើលថែទាសុខភាព និងបង្កាត់ពូជគោ និងសេះ បានប្រាប់ឲ្យដឹងថា បច្ចុប្បន្នកសិដ្ឋានបានចិញ្ចឹមពូជគោ ប្រាម៉ាន់ របស់អាមេរិកចំនួន១៣ក្បាល និងសត្វសេះមកពីអាមេរិក និងអារ៉ាប់ និងសេះខ្មែរ ១៣ក្បាលដែរ សម្រាប់ធ្វើការបង្កាត់ពូជតាមបច្ចេកវិទ្យាទំនើប ដើម្បីចែកជូនទៅដល់កសិករ និងពលរដ្ឋទូទៅ ដែលមានលទ្ធភាព ឬមិនមានលទ្ធភាពក៏អាចចិញ្ចឹមបាន។ គោប្រាម៉ាន់ និងសេះប្រណាំងទាំងនេះ មិនត្រឹមតែអាចទាក់ទាញទេសចរណ៍ ឲ្យមកកម្សាន្តទេ ប៉ុន្តែបងប្អូនពលរដ្ឋដែលចាប់អារម្មណ៍យកពូជទៅចិញ្ចឹម និងទទួលបានប្រាក់ចំណេញជាងចិញ្ចឹមសត្វគោ និងសេះខ្មែរបួនទៅប្រាំងដង។
ប្រធានមន្ទីរទេសចរណ៍ខេត្តកែប លោក សោម ចិន្តា បានប្រាប់ឲ្យដឹងថា តាមការពិនិត្យជាក់ស្តែង ទីតាំងកសិដ្ឋានមានទេសភាព និងបរិយាកាសគួរឲ្យចង់ទៅកម្សាន្ត ។ ហើយកសិដ្ឋាននេះនឹងអាចក្លាយជា តំបន់កសិ-ទេសចរណ៍ថ្មីមួយដ៏ទាក់ទាញក្នុងពេលឆាប់ៗនេះ ព្រោះវាស្ថិតនៅតំបន់ភ្នំវល្ល៍ ដែលជាសមរភូមិក្តៅនៅទសវត្សឆ្នាំ១៩៩០ តែបច្ចុប្បន្នបានប្រែក្លាយជាតំបន់អភិវឌ្ឍន៍យុទ្ធសាស្ត្ររបស់ខេត្ត មានចំការម្រេច ទុរេន ស្វាយ និងមានរីស៊តជាច្រើនកន្លែងផងដែរ។ លោកបានបញ្ជាក់ថា កសិដ្ឋាន SV Ranch Cambodia និងផ្តល់បទពិសោធន៍ថ្មីមួយទៀតសម្រាប់អ្នកទេសចរដែលមកសំរាក កម្សាន្តនៅខេត្តកែប ៕
