(ភ្នំពេញ)៖ ក្រុមគ្រួសាររបស់សហភាពសហព័ន្ធយុវជនកម្ពុជា បានយកភេជ្ជសៈមួយចំនួន ឧបត្ថម្ភជូនកងកម្លាំងប្រដាប់អាវុធគ្រប់ប្រភេទ ដែលកំពុងឈរជើងនៅតាមបណ្ដាទីតាំងបញ្ជាការស្រាល និងតាមដងផ្លូវនានា ក្នុងការការពារសុវត្ថិភាពជូនថ្នាក់ដឹកនាំ នៃបណ្ដាប្រទេសក្នុងតំបន់ និងពិភពលោក ដែលអញ្ជើញមកចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធដែលកម្ពុជាធ្វើជាម្ចាស់ផ្ទះ។
សហភាពសហព័ន្ធយុវជនកម្ពុជា ក៏បានថ្លែងអំណរគុណដល់កិច្ចប្រឹងប្រែង និងការលះបង់របស់កងកម្លាំងប្រដាប់អាវុធគ្រប់ប្រភេទ ដែលឈរជើងការពារសុវត្ថិភាពជូនដល់ថ្នាក់ដឹកនាំ និងសម្រួលចរាចរណ៍ដល់ប្រជាពលរដ្ឋ ឲ្យបានធ្វើដំណើរដោយងាយស្រួល។
សូមរំលឹកថា កម្ពុជា ធ្វើជាម្ចាស់ផ្ទះក្នុងកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ចាប់ផ្ដើមថ្ងៃទី០៨ ដល់ថ្ងៃទី១៣ ខែវិច្ឆិកា ឆ្នាំ២០២២ ហើយដោយកិច្ចប្រជុំនេះ មានថ្នាក់ដឹកនាំកំពូលពិភពលោក និងស្ថាប័នអន្តរជាតិចូលរួម។
កម្លាំងដែលបានប្រើប្រាស់ដើម្បីការពារសន្ដិសុខ សណ្ដាប់ធ្នាប់ និងសុវត្ថិភាព ជូនថ្នាក់ដឹកនាំបណ្ដាប្រទេស និងស្ថាប័ននានា មានចំនួនប្រមាណជាង១ម៉ឺននាក់ ក្នុងនោះមានទាំងកងកម្លាំងនគរបាលជាតិ, កងរាជអាវុធហត្ថ និងកងយោធពលខេមរភូមិន្ទផងដែរ ហើយកងកម្លាំងទាំងអស់នេះ គឺមកពីបណ្ដាអង្គភាព និងស្ថាប័ន ចំនួន១៤៕
