(រតនគិរី)៖ លោក ណាប់ ប៊ុនហេង ប្រធានក្រុមប្រឹក្សាខេត្តរតនគិរី និងលោកញ៉ែម សំអឿន អភិបាលខេត្ត នៅព្រឹកថ្ងៃទី៩ ខែកក្កដា ឆ្នាំ២០២២នេះ បានដឹកនាំមន្ត្រីរាជការក្នុងខេត្ត នាំយកទៀនព្រះវស្សា និងទេយ្យទាន គ្រឿងឧបភោគបរិភោគវេរប្រគេនដល់ព្រះសង្ឃចំនួន៤០វត្ត។
ពិធីប្រគេនទៀនវស្សា និងទេយ្យទាននេះ បានប្រារព្ធធ្វើនៅវត្តឥសាន្តរតនារាម (វត្តភ្នំស្វាយ) ស្ថិតនៅភូមិភ្នំស្វាយ សង្កាត់បឹងកន្សែង ក្រុងបានលុង។
ក្នុងឱកាសនោះ លោក ញ៉ែម សំអឿន បានថ្លែងថា ទៀនព្រះវស្សា និងទេយ្យវត្ថុដែលនាំមកប្រគេនព្រះសង្ឃនាពេលនេះ គឺសម្រាប់ប្រើប្រាស់ប្រចាំថ្ងៃរបស់ព្រះសង្ឃ ក្នុងរយៈពេលគង់ចាំព្រះវស្សាអស់ត្រីមាស នៅតាមទីវត្តអារាមនានា ដែលព្រះសង្ឃមិនអាចនិមន្តចេញទៅបិណ្ឌបាត្របាន ដោយរដូវវស្សាមានភ្លៀងធ្លាក់ជោគជាំ ដើម្បីឧទ្ទិសកុសលដល់វិញ្ញាណក្ខន្ធអ្នកដែលបានចែកឋានទៅកាន់បរលោកខាងមុខនោះផងដែរ។
លោកអភិបាលខេត្ត បានបន្តថា ដោយឡែកសម្រាប់ប្រជាពលរដ្ឋ និងពុទ្ធបរិស័ទ បានចាត់ទុកទីវត្តអារាម គឺមិនត្រឹមតែបម្រើវិស័យសាសនាប៉ុណ្ណោះទេ វាគឺជាទីកន្លែងសក្ការៈបូជារបស់បងប្អូនពុទ្ធបរិស័ទថែមទៀត គឺជាទីកន្លែងដែលប្រមូលផ្តុំនូវវប្បធម៌ និងជាថ្នាលបណ្តុះបណ្តាលធនធានមនុស្សជាជង្រុក នៃមូលដ្ឋានគ្រឹះអក្សរសាស្ត្រជាតិ អរិយធម៌ វប្បធម៌ខ្មែរយើងយ៉ាងពិតប្រាកដមិនអាចខ្វះបានឡើយ ។
លោក ញ៉ែម សំអឿន បានគូសបញ្ជាក់ថា «យើងទាំងអស់គ្នាតែងតែគោរពប្រពៃណីសាសនាព្រះពុទ្ធ គឺព្រះសង្ឃត្រូវចូលកាន់ព្រះវស្សា ក្នុងរយៈពេលអស់មួយត្រីមាស ដែលព្រះសង្ឃគង់ចាំព្រះវស្សានៅក្នុងទីវត្តអារាមនោះ ទើបថ្ងៃនេះត្រូវបាន គណៈអភិបាល និងប្រធានក្រុមប្រឹក្សាខេត្ត សប្បុរសជនក្នុងខេត្ត បាននាំយកនូវទេយ្យវត្ថុដើម្បីវេរប្រគេនដល់ព្រះសង្ឃ សម្រាប់យកទៅដុតបំភ្លឺ បូជាថ្វាយព្រះ និងសិក្សារៀនសូត្រនូវគម្ពីធម៌វិន័យ ព្រះសម្មាសាម្ពុទ្ធ ព្រះបរមគ្រូនៃយើង ។ចំពោះការប្រគេនទៀនព្រះវស្សានេះ គឺជាការប្រារឰធ្វើទៅតាមទំនៀមទំលាប់ប្រពៃណីព្រះពុទ្ធសាសនា ដែលមាននាសម័យកាលយូរលង់មកហើយ នៅជារៀងរាល់ឆ្នាំ និងដើម្បីប្រគេនព្រះសង្ឃដែលគង់ចាំព្រះវស្សាក្នុងរយៈពេលមួយត្រីមាស ដែលចាប់ចូលពីថ្ងៃ ១រោច ខែអាសាឍ រហូតដល់ថ្ងៃពេញបូរមីខែអស្សុជ»។
សូមបញ្ជាក់ថា ទៀនព្រះវស្សា និងទយ្យទានដែលប្រគេនព្រះសង្ឃទាំង៤០វត្ត ក្នុងខេត្ត ក្នុង១វត្ត ទទួលបានអង្ករ ២បេ, មី ២កេស, ទឹកត្រី ១យួរ,ទឹកស៊ីអ៉ីវ ១យួរ, អំបិល ៥គីឡូក្រាម, ប្រេងឆា ២លីត្រ, ប៊ីចេង ១គីឡូក្រាម, ស្ករស ៣គីឡូក្រាម,ព្រមទាំងបច្ច័យ ១០ម៉ឺនរៀល។
ឆ្លៀតក្នុងឱកាសនោះដែរ លោកក៏បានអញ្ជើញផ្តល់រង្វាន់ជូនដល់សាមណៈសិស្សដែលបានសិក្សារៀនសូត្រ នៅពុទ្ធិកសាលាក្នុងទីអារាមខាងលើដែលបានរៀនបានលេខ១ ដល់លេខ៣ ផងដែរ៕
