ខេត្តរតនគិរី ៖ លោក ប៊យ មករា ដែលគេស្គាល់ថា គឺជាឈ្មួញរកស៊ីឈើដុះស្លែប្រចាំខេត្តមរតនគិរី ច្រើនឆ្នាំមកហើយនោះ បច្ចុប្បន្ននៅតែមានឈ្មោះបោះសំឡេងក្នុងមុខរបរជំនួញរកស៊ីឈើដដែល គ្មានសមត្ថកិច្ច ឬមន្ត្រីជំនាញណាហ៊ានបង្ក្រាបឡើយ សង្ស័យមានអ្នកកាងពីក្រោយខ្នង ខណៈឈ្មួញឧកញ៉ាធំៗមួយចំនួនបានបោះបង់ជំនួញរកឈើនេះចោល បន្ទាប់ពីមានការចុះបង្ក្រាបដោយគណៈកម្មការបង្ក្រាបបទល្មើសធនធានធម្មជាតិនាពេលកន្លងមក។
បើតាមប្រភពគួរឲ្យទុកចិត្តបាននិយាយថា ឈ្មួញឈើឈ្មោះ ប៊យ មករា បានធ្វើការប្រមូលទិញឈើពីស្រុកវ៉ើនសៃ រួចដឹកជញ្ជូនយកទៅស្តុកទុកក្នុងឃ្លាំងនៅចំណុចភូមិភ្នំ សង្កាត់បឹងយក្សឡោម ក្រុងបានលុង ខេត្តរតនគិរី ជារៀងរាល់ថ្ងៃ។
ប្រភពដដែលបន្តថា បន្ទាប់ពីរត់ការរួចទើបលើកដាក់រថយន្តធ្វើការដឹកជញ្ជូនបន្តនាំទៅលក់ឲ្យឈ្មួញនៅប្រទេសវៀតណាមតាមច្រកទ្វារព្រំដែនអន្តរជាតិអូរយ៉ាដាវយ៉ាងរលូនបំផុត។
ប្រភពខាងលើនេះ ចាត់ទុកជាសេចក្តីរាយការណ៍ជូនដល់លោក ហុង ភា នាយខណ្ឌរដបាលព្រៃឈើ ខេត្តរតនគិរី, លោកឧត្តមសេនីយ៍ទោ យិន ចំណាន ស្នងការនគរបាលបាលខេត្ត និងលោកឧត្តមសេនីយ៍ត្រី នូវ តារ៉ា ស្នងការរងទទួលផែនប្រឆាំងបទល្មើសសេដ្ឋកិច្ច ពិសេសគឺឯកឧត្តម ញ៉ែម សំអឿន អភិបាលនៃគណៈអភិបាលខេត្តរតនគិរី ដើម្បីមានវិធានការចុះបង្ក្រាបទីតាំងស្តុកឈើខាងលើ ទប់ស្កាត់ការកាប់បំផ្លិចបំផ្លាញព្រៃឈើ និងសកម្មភាពជួញឈើខុសច្បាប់។
សូមបញ្ជាក់ថា ថ្មីៗនេះក្រសួងកសិកម្ម រុក្ខាប្រមាញ់ និងនេសាទបានចេញសេចក្តីជូនដំណឹងលេខ ២៧៣៦ កសក ចុះថ្ងៃទី០៥ ខែមេសា ឆ្នាំ២០២២ ស្តីពី «វិធានការពង្រឹង ទប់ស្កាត់ និងបង្ក្រាបបទល្មើសព្រៃឈើ សត្វព្រៃ និងជនផល» នៅទូទាំងប្រទេសកម្ពុជា ដើម្បីធ្វើការពង្រឹងការគ្រប់គ្រងធនធានព្រៃឈើ សត្វព្រៃ និងធនធានជលផលឲ្យបានល្អប្រសើរ៕
