ខេត្តប៉ៃលិន ៖ បុរសម្នាក់រងរបួសជើងឆ្វេង ត្រូវបានគេឱ្យចូលទៅលាងរបួសនៅក្នុងគ្លីនិកឯកជន ក្បែរកន្លែងកើតហេតុ ខណ:គាត់ចុះពីលើរថយន្តទៅទិញថ្នាំលេប លុះដើរឆ្លើងផ្លូវទៅកន្លែងចតរថយន្តវិញ ស្របពេលដែលសិស្សសាលាកំពុងចេញពីរៀន បណ្តាលឱ្យបុកដួលរងរបួសទាំង៣នាក់តែម្តង។
ហេតុការណ៍ម៉ូតូសិស្សសាលាបុកបុរសចំណាស់ដើរឆ្លើងផ្លូវរងរបួសទាំង៣នាក់នេះ បានកើតឡើងនៅវេលាម៉ោង ៥និង១០នាទីល្ងាចថ្ងៃទី២៣ ខែកុម្ភ: ឆ្នាំ២០២២ ស្ថិតនៅបណ្តោយផ្លូវជាតិលេខ ៥៧ ក្នុងភូមិអូរតាពុកលើ សង្កាត់ទួលល្វា ក្រុងប៉ៃលិន ខេត្តប៉ៃលិន។
ប្រភពព័ត៌មានបានឱ្យដឹងថា ៖ បុរសចំណាស់រងគ្រោះដែលដើរឆ្លើងផ្លូវថ្នល់ត្រូវម៉ូតូសិស្សសាលាបុក មាន ឈ្មោះ អៅ ណែត ភេទប្រុស អាយុ៦០ឆ្នាំ រងរបួសជើងឆ្វេង រស់នៅភូមិបរហ៊ុយ សង្កាត់បរយ៉ាខា ក្រុងប៉ៃលិន។ ចំណែកសិស្សសាលាដែលបើកម៉ូតូបុកបុរសចំណាស់ មាន ឈ្មោះ ណាប់ ភីណូ ភេទប្រុស អាយុ១៥ឆ្នាំ ជាសិស្ស រងរបួសជើងស្រាល ជាអ្នកបើកបរម៉ូតូម៉ាកធូដេ(Today) ពណ៌សពាក់ ស្លាកលេខ ប៉ៃលិន 1C- 4167 រងការខូចខាតស្រាល និងអ្នករួមដំណើរ មាន ឈ្មោះ លី សុឈិង ភេទប្រុស អាយុ១៦ឆ្នាំ រងរបួសស្រាល ជាសិស្ស ទាំងពីរនាក់រស់នៅក្នុងភូមិកូនភ្នំ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។
ប្រភពបន្តទៀតថា មុនពេលកើតហេតុ គេឃើញបុរសចំណាស់ម្នាក់ ជិះរថយន្តក្នុងទិសដៅពីលិចទៅកើត រួចក៏បត់ឆ្វេងចតឈប់នៅក្បែរចិញ្ចើមផ្លូវ រួចក៏ដើរឆ្លងផ្លូវទៅទិញថ្នាំពេទ្យនៅម្ខាងផ្លូវផ្នែកខាងឆ្វេងដៃ លុះគ្រូពេទ្យផ្សំថ្នាំរួចរាល់ ក៏ដើរត្រឡប់មកកន្លែងរថយន្តវិញ ស្របពេលដែលសិស្សសាលា ចេញពីរៀន ដោយបើកបរក្នុងទិសដៅពីលិចទៅកើតដូចគ្នា លុះគាត់ដើរឆ្លងផុតម៉ូតូផ្សេង ស្រាប់តែម៉ូតូ សិស្សរងគ្រោះមើលមិនឃើញ ព្រោះបាំងនឹងម៉ូតូខាងមុខ ក៏វាក់ជាមួយនឹងបុរសចំណាស់ បណ្តាលឱ្យបុ កពេញទំហឹងដួលប្រាវរងរបួសទាំង៣នាក់តែម្តង។
ក្រោយពេលកើតហេតុ បុរសចំណាស់ និងក្មេងរងរបួសបានទៅលាងរបួសនៅគ្លីនិកក្បែរកន្លែង កើតហេតុ រីឯម៉ូតូត្រូវបាននគរបាលលើកយកទុកនៅក្បែរចិញ្ចើមផ្លូវ ដើម្បីធ្វើការដោះស្រាយ៕
