ខេត្តប៉ៃលិន ៖ រហូតមកដល់ព្រឹកថ្ងៃទី២១ ខែកុម្ភ: ឆ្នាំ២០២២នេះ គណកម្មការសម្របសម្រួលដីធ្លីឃុំស្ទឹងកាច់ បានចុះពិនិត្យទីតាំងដីចំការជាក់ស្តែង ដោយមានសាក្សីដឹងឮជាង២០នាក់គាំទ្រក្មេងស្រីកំព្រាឪពុកម្តាយ រស់នៅគ្មានសាច់ញាតិបងប្អូន ខណ:នាងប្តឹងចោទទៅលើស្ត្រីវ័យចំណាស់ម្នាក់ ជាអតីតប្រធានមន្ទីរកិច្ចការនារីខេត្តប៉ៃលិន និងជាអ៊ុសាច់ថ្លៃរបស់ខ្លួនថា បានហៅមន្ត្រីសុរិយោដី ទៅវាស់ដីជាង៣ហិកតា ជាកេរិ៍តរបស់ខ្មោចឪពុកម្តាយខ្លួន ធ្វើប្លង់កម្មសិទ្ធិយកទាំងមានដាំដំណាំស្វាយកែវរមៀតពេញផ្ទៃចំការ លុះកើតទុក្ខមិនសុខចិត្តក៏ដាក់ពាក្យបណ្តឹងទៅអាជ្ញាធរឃុំស្ទឹងកាច់ ឱ្យជួយអន្តរាគមន៍តែម្តង។ ចំណែកសាក្សីអ្នករស់នៅជិតខាងភូមិផងរបងជាមួយពិតជាមានការហួសចិត្តយ៉ាងខ្លាំង មិនគួរណាអ៊ុស្រីរបស់នាងហ៊ានធ្វើទាំងបំពាន ដែលដីនេះ ស្ថិតនៅក្នុងភូមិផ្សារព្រំ ភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ស្ត្រីវ័យក្មេងដែលដាក់ពាក្យបណ្តឹងទាមទារដីពីអ៊ុស្រីសាច់ថ្លៃ មាន ឈ្មោះ អ៊ុ វន្នី ហៅជា អាយុ២៥ឆ្នាំ មានប្តី ឈ្មោះ ឈាង ចន្ថា អាយុ២៧ឆ្នាំ មានកូន២នាក់ កូនទី១. ឈ្មោះ សូនី វណ្ណធី ភេទស្រី អាយុ៣ឆ្នាំ កូនទី២ ឈ្មោះ សូនី វណ្ណថាណា ភេទប្រុស អាយុ១០ខែ មានឪពុក ឈ្មោះ អ៊ុ សារិទ្ធ អាយុ៥៧ឆ្នាំ(ស្លាប់) ម្តាយ ឈ្មោះ កែវ វណ្ណា អាយុ៥៩ឆ្នាំ(ស្លាប់) រស់នៅភូមិផ្សារព្រំ ឃុំស្ទឹងកាច់ ស្រុកសា លាក្រៅ ខេត្តប៉ៃលិន។ ចំណែកស្ត្រី ដែលរងការចោទប្រកាន់ថាលួចធ្វើប្លង់ដីក្មេងស្រីធ្វើជាកម្មសិទ្ធិ មាន ឈ្មោះ អ៊ិត យុត អាយុជាង៦០ឆ្នាំ រស់នៅក្នុងភូមិបរតាំងស៊ូ សង្កាត់បរយ៉ាខា ក្រុងប៉ៃលិន ខេត្តប៉ៃលិន។
ស្ត្រីវ័យក្មេង ឈ្មោះ អ៊ុ វន្នី បានរៀបរាប់ឱ្យដឹងថា ៖ អស់រយ:ពេលជាង២០ឆ្នាំហើយ ដែលឪពុកម្តាយខ្លួន បានលក់ដីធ្លីនៅឯខេត្តកំពង់ឆ្នាំង ចូលមកស្នាក់អាស្រ័យរស់នៅក្នុងទឹកដីខេត្តប៉ៃលិន ពោលគឺតាំងពីនាងនៅកុមារភាពអាយុប្រហែល៦ឆ្នាំម្លេះ ដោយនៅពេលនោះឪពុកម្តាយរបស់នាងបានខិតខំប្រឹ ងប្រែងកាប់ឆ្កាព្រៃចំការមីននៅក្បែរដីរបស់ស្ត្រីចំណាស់ ឈ្មោះ អ៊ិត យុត ដែលត្រូវជាបងថ្លៃរបស់គាត់។ ការកាប់ឆ្កាព្រៃពី១ថ្ងៃទៅ១ថ្ងៃ រហូតដល់បានជាង៣ហិកតា ទើបគ្រួសាររបស់នាងចាប់ផ្តើមដាំត្រប់ ម្ទេស ដាំអំពៅ ដាំពោត សណ្តែក និងដំឡូងមី ក៏មានដាំស្រូវកិនអង្ករហូបផងដែរ។ ស្ត្រីវ័យក្មេងរៀបរាប់បន្តទាំងហួសចិត្តថា ក្រោយពីឪពុកម្តាយស្លាប់បន្តបន្ទាប់អស់នៅឆ្នាំ២០១៦ ស្រាប់តែស្ត្រីវ័យចំណាស់ ឈ្មោះ អ៊ិត យុត បានអះអាងថា ដីខាងលើជាដីរបស់គាត់ ខណ:ដែលឪពុកម្តាយនាងតែងតែផ្តាំផ្ញើមុនពេលស្លាប់ ឱ្យខិតខំប្រឹងប្រែងថែទាំដំណាំស្វាយកែវរមៀត ដើម្បីបានផ្លែលក់ផ្គត់ផ្គង់ជីវភាពប្រចាំថ្ងៃ។ ព្រោះតែជីវភាពខ្វះខាត ដីជាង៣ហិកតាខាងលើ មិនទាន់បានធ្វើប្លង់ត្រឹមត្រូវនោះទេ គឺរង់ចាំខាងមន្ត្រីសុរិយោដីចូលទៅវាស់វែងធ្វើប្លង់ជាប្រព័ន្ធ ព្រោះមិនអស់ថវិកាច្រើន។ តែដោយសារជីវភាពខ្វះខាត ក្រោយពីរៀបការរួច នាងក៏បានជួលដីចំការឱ្យគេ ហើយក៏ទុកចំការចោលមួយរយ: ធ្វើដំណើរទៅខេត្តព្រះវិហារ ដើម្បីធ្វើជាមេការត្រួតមើល គេបេះផ្លែស្វាយឱ្យថៅកែម្នាក់នៅទីនោះ ស្រាប់តែស្ត្រី ឈ្មោះ អ៊ិត យុត នាំកូនចៅ និងមន្ត្រីសុរិយោដីទៅវាស់វែងលួចធ្វើប្លង់កម្មសិទ្ធិអស់រលីងកាលពីឆ្នាំ២០១៩។
ប្រភពបញ្ជាក់ទៀតថា បើសិនជាដីខាងលើជារបស់ស្ត្រីវ័យចំណាស់ គឺគាត់មិនអាចឱ្យឪពុកម្តាយរបស់ខ្លួនដាំដើមស្វាយកែវរមៀត រហូតដល់ធំៗ មានអាយុជិត១០ឆ្នាំ។ ឪពុកម្តាយរបស់នាងក៏បានចាក់សង់គ្រឹះផ្ទះរឹងមាំនៅលើដីរបស់ខ្លួន លុះក្រោយពេលឪពុកម្តាយទទួលមរណភាព នាងក៏បានយកធាតុពួកគាត់ ទៅបញ្ចុះនៅលើដីរបស់ខ្លួនដែរ។ បើសិនជាដីខាងលើជារបស់ស្ត្រីចំណាស់ម្នាក់នោះ គឺគេ មិនព្រមនោះឡើយ។ ទោះបីជាយ៉ាងណា នាងបានដាក់ពាក្យបណ្តឹងទៅខាងឃុំស្ទឹងកាច់រួចរាល់អស់ ហើយ រង់ចាំមើលលទ្ធផល ព្រោះនាងមានសាក្សីជាច្រើនមិនមែនជាបងប្អូនសាច់ញាតិ បានអះអាងថា ដីខាងលើឪពុកម្តាយនាង ដែលបានតស៊ូកាប់ឆ្ការានព្រៃប្រថុយប្រថាននឹងគ្រាប់មីនប្រាកដមែន។
បើតាមការរៀបរាប់ពីសាក្សី ឈ្មោះ ង៉ែត វ៉ិត ភេទប្រុស អាយុ៥៦ឆ្នាំ ឈ្មោះ ងួន ម៉េត ភេទប្រុស អាយុ៤៨ឆ្នាំ ឈ្មោះ តុប រ៉ន ភេទប្រុស អាយុ៦៦ឆ្នាំ ឈ្មោះ ចាន់ធឿន អាយុ៥៣ឆ្នាំ ព្រមទាំងសាក្សីដទៃទៀតសរុបជាង២០នាក់ រស់នៅក្នុងភូមិខាងលើ បានរៀបរាប់ឱ្យដឹងថា ៖ ដីខាងលើនេះ គឺឪពុកម្តាយរបស់ក្មេងស្រីខាងលើជាអ្នកកាប់រានព្រៃដាំបន្លែជាមួយនឹងអ្នកភូមិចាប់តាំងពីឆ្នាំ២០០០មកម្លេះ។ ពួកគាត់បន្តទៀតថា បើសិនជាដីរបស់ស្ត្រី ឈ្មោះ អ៊ិត យុត មែន កាលពីពួកគាត់នៅរស់ គឺឪពុកម្តាយ របស់ក្មេងស្រី មិនមានសិទ្ធិជួលដើមស្វាយទាំងអស់ឱ្យឈ្មួញនោះឡើយ។ ម្យ៉ាងវិញទៀត ដីខាងលើនេះ គឺឪពុកម្តាយរបស់នាងជាអ្នកគ្រប់គ្រងជាយូរណាស់មកហើយ ពោលគឺកាលពីពួកគាត់នៅរស់គ្មានអ្នកណារករឿងនោះទេ មានសង់ផ្ទះនៅលើដី លុះពេលពួកគាត់ស្លាប់អស់ ស្របពេលដីឡើងថ្លៃ ក៏លួចធ្វើប្លង់យកធ្វើជាកម្មសិទ្ធិតែម្តង។
បើតាមការរៀបរាប់របស់លោកស្រី គង់ ស្រី មេភូមិអូររអិល បានរៀបរាប់អះអាងឱ្យដឹងថា ៖ ដីចំការទាំងប៉ុន្មានខាងលើ គឺជាដីកេរ្តិ៍របស់ខ្មោចឪពុកម្តាយក្មេងស្រីរងគ្រោះ ពិតប្រាកដមែន ដោយឪពុកម្តាយនាង ជាអ្នកកាប់ឆ្ការានយកដាំដំណាំ ចាប់តាំងពីព្រៃមានជ្រូក ខ្លា និងគ្រាប់មីនរាប់សិបនៅក្នុងដីនោះ។ លោកស្រីមេភូមិបន្តទៀតថា ទោះបីជាយ៉ាងណា ក៏គាត់ដឹងច្បាស់ពាក់ព័ន្ធនឹងដីនេះដែរ ហើយ ក៏អាចចូលរួមធ្វើសក្សីជូនក្មេងខាងលើបានគ្រប់ពេល។
ពាក់ព័ន្ធទៅនឹងបញ្ហានេះ លោកស្រី អ៊ិត យុត អតីតប្រធានមន្ទីរកិច្ចការនារីខេត្តប៉ៃលិន បានបំភ្លឺនៅក្បែរកន្លែងដីចំការខាងលើឱ្យដឹងថា ៖ ដីចំការទាំងអស់នេះ គឺគាត់កាន់កាប់ និងបានកាប់ឆ្កាតាំងពីឆ្នាំ២០០០ ដោយប្អូនថ្លៃរបស់គាត់បានមកពីខេត្តកំពង់ឆ្នាំងសុំអាស្រ័យផល គឺសុំគាត់សង់ខ្ទមស្នាក់នៅបណ្តោះអាសន្នប៉ុណ្ណោះ។ គាត់បន្តទៀតថា រហូតមកដល់ពេលនេះ ដីខាងលើ គាត់បានធ្វើប្លង់ហ៊ុយកទាំងអស់ហើយ ព្រោះជាដីកម្មសិទ្ធិរបស់ខ្លួន គ្រាន់តែឱ្យពួកគេអាស្រ័យផលប៉ុណ្ណោះ៕
