ខេត្តបន្ទាយមានជ័យ:យ៉ាងហោចណាស់ មានមនុស្សចំនួន៣នាក់ ក្នុងនោះមានស្រី១នាក់ផងដែរបានស្លាប់ ក្នុងថ្ងៃតែ១
នៅក្រុង ស្រុកផ្សេងគ្នា ក្នុងភូមិសាស្ត្រខេត្តបន្ទាយមានជ័យ ដោយសារតែលង់ទឹក កាលពីថ្ងៃទី៣ ខែ តុលា ឆ្នាំម២០២១។
នគរបាលបានឲ្យដឹងថា ករណីទី១
បានកើតឡើង នៅវេលាម៉ោង៤និង២៤នាទីល្ងាច ថ្ងៃទី៣ ខែតុលា ឆ្នាំ២០២១ លើក្មេងស្រី១នាក់មាន ឈ្មោះ ធា ស្រីលិ អាយុ១១ឆ្នាំ នៅភូមិភ្នំតូចជើង ឃុំភ្នំតូច ស្រុកមង្គលបូរី បានលង់ទឹកស្លាប់។
នគរបាលមូលដ្ឋានបញ្ជាក់ឲ្យដឹងបន្តទៀតថាមុនពេលកើតហេតុជនរងគ្រោះបាននាំគ្នា ទៅលេងទឹកប្រឡាយដែលមានជម្រៅជ្រៅ ខាងកើតភូមិចម្ងាយពីភូមិ១.០០០មែត្របណ្តាលឲ្យលង់ស្លាប់។
ករណីទី២ នៅក្រុងប៉ោយប៉ែត នៅវេលាម៉ោង៤និង២០នាទីល្ងាច ថ្ងៃទី៣ ខែតុលា ឆ្នាំ២០២១ លើបុរស១នាក់ មានឈ្មោះ សុន សាវុធ ភេទប្រុស អាយុ៤២ឆ្មាំ រស់នៅភូមិកូនដំរី សង្កាត់និមិត្ត ក្រុងប៉ោយប៉ែត។ មុនពេលកើតហេតុជនរងគ្រោះ បានបើកទូកទៅនេសាទត្រីនៅក្នុងតំបន់បឹងអូខៃដន ពីរនាក់កូនប្រុស អាយុ១៣ឆ្នាំពេលនោះ ជនរងគ្រោះបើកទូកជ្រុលទៅបុកច្រាំង បណ្តាលឲ្យឪពុកធ្លាក់ពីលើទូក ចូលទឹកហូររសាត់តាមទឹកបាត់ខ្លួនតែម្តង។បន្ទាប់មកកម្លាំងផ្នែកសឹករងក្រុងប៉ោយប៉ែត ចំនួន១០ នាក់ បានរុករកជាច្រើនម៉ោងទើបប្រទះឃើញសព។
ចំណែកករណីទី៣ នៅស្រុកភ្នំស្រុក នៅវេលាម៉ោង៦និង៤០នាទីយប់ ថ្ងៃទី៣ ខែតុលា ឆ្នាំ២០២១ លើបុរសម្នាក់ ឈ្មោះ អឿន រិន ហៅម៉ាប់ ភេទប្រុស អាយុ២៣ឆ្នាំ រស់នៅភូមិកន្ទួត សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ បានទៅដាក់បង្កៃស្ទូចត្រី នៅចំណុចលូបួនជ្រុង ខាងកើតភូមិគោករំចេក ចំងាយ១,៣០០ម៉ែត្រ ស្ថិតក្នុងឃុំស្រះជីក ស្រុកភ្នំស្រុក។
មុនពេលកើតហេតុ តាមការឲ្យដឹងពីអ្នកទៅដាក់បង្កៃជាមួយគ្នាប្រាប់ថា ក្រោយពីបុរសរងគ្រោះ បានដាក់បង្កៃស្ទូចត្រីរួច ក៏ដើរមកលាងជើង លាងដៃ នៅខាងមុខលូស្រាប់តែរអិលជើងធ្លាក់ចូលទៅក្នុងលូទឹកកំពុងហូរខ្លាំងនិងបានស្រែកឲ្យគេជួយតែជួយមិនទាន់ដោយសារតែទឹកហូរខ្លាំងពេច ទើបបណ្តាលឲ្យជនរងគ្រោះថប់ដង្ហើមស្លាប់នៅកន្លែងកើតហេតុ។
ករណីជនរងគ្រោះស្លាប់ទាំង៣នាក់នេះ ក្រោយពីសមត្ថកិច្ចធ្វើការពិនិត្យកោលសល្យវិច្ច័យរួចមក សពជនរងគ្រោះត្រូវបានប្រគល់ជូនក្រុមគ្រួសារ ដើម្បីយកទៅចាត់ចែងធ្វើបុណ្យតាមប្រពៃណីនៅផ្ទះរៀងខ្លួន៕
