ខេត្តបន្ទាយមានជ័យ៖ក្រោយពីប្តី ត្រូវបានសមត្ថកិច្ចចាប់ឃាត់បញ្ជូនទៅពន្ធនាគារ ពាក់ព័ន្ធករណីគ្រឿងញៀន ស្ត្រីជាប្រពន្ធបាននាំកូនប្រុស ស្រី ចំនួន៤នាក់ ដើររើសអេតចាយលក់ និងសុំទានគេ ដើម្បីចិញ្ចឹមជីវិត ដល់ពេលយប់នាំគ្នាទីទៅដេកក្នុងបរិវេណកាស៊ីណូហាលភ្លៀង ទឹកសន្សើម រស់ទាំងវេទនា។
យោងតាមប្រជាពលរដ្ឋបានឲ្យដឹងថា ស្ត្រីរូបនេះមានឈ្មោះ ហែម ស្រីល័ក្ខ អាយុ៣៥ឆ្នាំ ស្នាក់នៅក្នុងភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ មានកូនប្រុស ស្រី ចំនួន៤នាក់ ដោយកូនច្បងអាយុ១២ឆ្នាំ និងកូនពៅអាយុ២ឆ្នាំសុទ្ធសឹងតែមិនបានចូលសាលាទាំងអស់។
ស្ត្រីកំសត់ខាងលើបានរៀបរាប់ទាំងអួលដើម.ក និយាយទាំងទឹកភ្នែកនៅមុខកូនៗរបស់ខ្លួនដែល កំពុងតែដេកលង់លក់លើចិញ្ចើមផ្លូវដោយគ្មានខ្នើយ និងគ្មានមុងផងនោះថា ប្តីគាត់ត្រូវសមត្ថកិច្ចចាប់ខ្លួនពាក់ព័ន្ធករណីប្រើប្រាស់គ្រឿងញៀន ដោយជាប់ពន្ធនាគារជិត២ខែមកហើយ។
ស្ត្រីរូបនោះបន្តថា ក្រោយពីប្តី ជាប់គុករួចមករូបគាត់គ្មានមុខរបររកស៊ីចិញ្ចឹមកូនៗទាំង៤នាក់នោះឡើយ ក្រៅពីនាំកូនៗដើរសុំទានគេ និងរើសអេតចាយផ្សំផង ជួនកាលសុំទានមិនបាន អេតចាយក៏រើសមិនបាន ព្រោះសម័យនេះជាសម័យកូវីដ១៩ មិនសូវមានមនុស្សឲ្យឡើយ។យប់ណាសុំទានគេបានយកលុយទៅទិញបាយឲ្យកូនៗហូបតែយប់ណារកលុយមិនបាន គឺត្រូវនាំកូនៗដេកលើ ចិញ្ចើមផ្លូវ លុះព្រឹកឡើងទើបនាំកូនៗ ដើរទៅផ្ទះដែលមានចម្ងាយ៣គីឡូម៉ែត្រ ពីទីប្រជុំជន។
ស្ត្រីកំសត់រូបនេះ បន្តទៀតថា សព្វថ្ងៃនេះសុំផ្ទះគេនៅ ប្តីក៏ជាប់គុកចំណែកកូនៗវិញក៏មិនបានចូលរៀនដូចកូនអ្នកដទៃឡើយ។បើនៅតែយ៉ាងនេះដោយសារការហូបចុក មិនត្រឹមត្រូវមិនមានមុង ភួយ ជាពិសេសគ្រោះអវិជ្ជា ដោយសារមិនបានចូលរៀនជាដើមជាពិសេសមានជំងឺ និងកើតមានឡើងលើក្រុមគ្រួសាររបស់គាត់ជាក់មិនខាន៕
