ព្រឹកថ្ងៃពុធ ៩រោច ខែពិសាខ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី៥ ខែឧសភា ឆ្នាំ២០២១ លោក ណុប ដារ៉ា អភិបាលរង នៃគណៈអភិបាលខេត្តបាត់ដំបង បានអញ្ជើញជាអធិបតីក្នុងពិធីក្រុងពលីសាងសង់បានអគារមត្តេយ្យសិក្សាថ្មី ១ខ្នង មានចំនួន ៣បន្ទប់ ស្ថិតក្នុងបរិវេណសាលាបឋមសិក្សាវត្តគរ ស្ថិតក្នុងភូមិវត្តគរ សង្កាត់វត្តគរ ក្រុងបាត់ដំបង ។
អគារមតេយ្យសិក្សាថ្មី ១ខ្នង មាន៣បន្ទប់សាងសង់នៅក្នុងបរិវេណសាលាបឋមសិក្សាសាវត្តគរ ស្ថិតនៅក្នុងភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង ក្រោមការឧបត្ថម្ភគាំទ្រសាងសង់ដោយលោក ឃឿន សុខុម និងលោកស្រី មឿន សាមឿត ។
លោក ណុប ដារ៉ា បានធ្វើការកោតសរសើរ និងថ្លែងអំណរគុណដល់ម្ចាស់ឧបត្ថម្ភគាំទ្រការសាងសង់អគារមតេយ្យសិក្សា១ខ្នងថ្មី មាន៣បន្ទប់នេះ គឺជាការចូលរួមគាំទ្រក្នុងវិស័យអប់រំនៅកម្ពុជា ដែលជាវិស័យមួយយ៉ាងសំខាន់ក្នុងការបណ្ដុះបណ្ដាលធនធានមនុស្សអោយមានការរីកចម្រើនឈានទៅដល់ការអភិវឌ្ឍន៍ប្រទេសឲ្យមានការរីកចម្រើនដូចបណ្ដាប្រទេសផ្សេងទៀត ។
លោក អភិបាលរងខេត្ត ក៏បានធ្វើការផ្តាំផ្ញើដល់លោកគ្រូអ្នកគ្រូត្រូវចូលរួមថែរក្សានូវសមិទ្ធផលថ្មីៗនឹងសមិទ្ធផលចាស់ ដើម្បីជាប្រយោជន៍សម្រាប់ការប្រើប្រាស់អោយបានយូរអង្វែង ។
