ខេត្តបាត់ដំបង ៖ លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំងក្រុមអន្តរាគមន៍បង្ការបង្ក្រាប ចុះប្រតិបត្តិការបង្ក្រាបករណីលួច (យកម៉ូតូ) ០១ ករណី និងបានធ្វើការនាំខ្លួនជនសង្ស័យ ០១ នាក់ នៅថ្ងៃទី១៩ ខែមេសា ឆ្នាំ២០២១ វេលាម៉ោង០៣:១០នាទី រំលងអាធ្រាត្រ នៅចំណុចភូមិវត្តរំដួល សង្កាត់ចំការសំរោង ក្រុងបាត់ដំបង ខេត្តបាត់ដំបង ។
ជនសង្ស័យ ឈ្មោះ ភាព សុភា ហៅ តូច ភេទប្រុសអាយុ ២៥ ឆ្នាំ មានទីលំនៅមិនពិតប្រាកដមកកាន់ស្នងការដ្ឋាន ។
គួរបញ្ជាក់ថា ៖ កាលពីថ្ងៃទី១៨ ខែមេសា ឆ្នាំ២០២១ វេលាម៉ោង១៩:៤០នាទី នៅចំណុចភូមិអូរចារ សង្កាត់អូរចារ ក្រុងបាត់ដំបង ខេត្តបាត់ដំបង ជនសង្ស័យខាងលើ បានធ្វើសកម្មភាពដើរតាមផ្លូវជាតិលេខ ៥ រួចក៏បានយកម៉ូតូរបស់ជនរងគ្រោះឈ្មោះ ហួន យឿម ភេទប្រុសអាយុ៦០ឆ្នាំ មានទីលំនៅភូមិអូរចារ សង្កាត់អូរចារ ក្រុងបាត់ដំបងខេត្តបាត់ដំបង ។ នៅពេលដែលជនរងគ្រោះកំពុងចុះពីលើម៉ូតូដើរទៅបត់ជើង ហើយជនសង្ស័យក៏បានជិះម៉ូតូរត់គេចខ្លួនបាត់ រហូតមកដល់ថ្ងៃទី១៩ ខែមេសា ឆ្នាំ២០២១ វេលាម៉ោង០៣:១០នាទី ទើបកម្លាំងសមត្ថកិច្ចយើងធ្វើការនាំខ្លួនជនសង្ស័យខាងលើ ប៉ុន្តែជនសង្ស័យបានតដៃមកលើសមត្ថកិច្ច ដែលកំពុងប្រតិបត្តិការ បណ្តាលអោយកម្លាំងសមត្ថកិច្ចយើងលោកព្រិន្ទបាលទោ សុង ហាក់ រងរបួសបាក់ម្រាមប្រអប់ដៃខាងឆ្វេង ។
វត្ថុតាង ដែលសមត្ថកិច្ចដកហូតរួមមាន៖
-ម៉ូតូ០១គ្រឿង ម៉ាកហុងដា ឌ្រីមសេ ១២៥ ពណ៌ខ្មៅ ស៊េរីឆ្នាំ២០១២ បិទតែមឆ្នាំ២០១៥ គ្មានស្លាកលេខ (ជារបស់ជនរងគ្រោះ) ។
បច្ចុប្បន្ន ការិយាល័យជំនាញកំពុងតែធ្វើការកសាងសំណុំរឿង ដើម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី ៕
