ខេត្តសៀមរាប ៖ លោកគ្រូអ្នកគ្រូដែលបង្រៀននៅសាលាគោកត្រប់ ក្នុងភូមិស្លាត ឃុំស្រែខ្វាវ ស្រុកអង្គរជុំដែលមានចម្ងាយប្រមាណជាង៧០គីឡូម៉ែត្រភាគខាងជើងនៃខេត្តសៀមរាប បានសម្តែងការព្រួយបារម្ភចំពោះសុវត្ថិភាពកូនសិស្សរបស់ពួកគាត់ខណៈគេប្រទះឃើញក្បាលគ្រាប់ និងសំបកគ្រាប់នៅជិតបរិវេណសាលារៀនដាច់ស្រយាលមួយនេះ លោក ភឹង ដៀត ដែលជាគ្រូបង្រៀនម្នាក់នៅសាលាគោកត្រប់បានឲ្យដឹងថាសាលាគោកត្រប់នេះ បានកសាងតាំង ពីឆ្នាំ២០១៣ក្រោមជំនួយរបស់ប្រទេសដាណឺម៉ាក។សាលានេះជាឧបសម្ព័ន្ធរបស់សាលាបឋម សិក្សា គោករាជ្យ។
លោកបន្តថា ចាប់តាំងពីបង្កើតមកសាលានេះមានការខ្វះខាតយ៉ាងខ្លាំង សូម្បីតែផ្លូវចូលសាលាក៏ដើរតាមផ្ទះប្រជាពលរដ្ឋដែរ។ថ្មីៗនេះក្នុងពេលដែលសាលាមាន ការខ្វះខាត ហើយនោះក៏ស្រាប់តែមានការប្រទះឃើញនូវសំបកគ្រាប់ក៏ដូចជាក្បាលគ្រាប់ចាស់ៗ នៅក្បែរបរិវេណសាលា ថែមទៀត ដែលបង្កឲ្យមានការព្រួយបារម្ភពីសុវត្ថិភាពយ៉ាងខ្លាំង។ លោកភឹង ដៀត បានសំណូមពរដល់អាជ្ញាធរដែនដីក៏ដូចជាស្ថាប័នពាក់ព័ន្ធនានាជាពិសេសអង្គការស៊ីម៉ាក មេត្តាជួយ រុករកគ្រាប់ក្នុងដីទាំងក្នុងនិងក្រៅបរិវេណសាលាដើម្បីកុំឲ្យមានគ្រោះថ្នាក់ជាយថាហេតុណា មួយដល់ប្រជាពលរដ្ឋនៅទីនោះ ក៏ដូចជាក្មេងៗសិស្សសាលា។
ពាក់ព័ន្ធនឹងករណីនេះលោក ភ្លក់ ផុស អភិបាលស្រុកអង្គរជុំ បានប្រាប់តាមទូរស័ព្ទថា នៅក្នុងភូមិសាស្ត្រស្រុកអង្គរជុំ គឺជាអតីតសមរភូមិប្រយុទ្ធនៅក្នុងសម័យសង្គ្រាមស៊ីវិលប្រាកដណាស់ថា ដែលនៅមានសំបកគ្រាប់ខ្លះនៅសល់។ប៉ុន្តែលោកបានបញ្ជាក់ថាមុននឹងមានការសាងសង់សាលានេះ ទាំងមេភូមិនិងមេឃុំពួកគាត់បានស្គាល់ច្បាស់អំពីភូមិសាស្ត្រនេះច្បាស់ណាស់។ ទោះជាយ៉ាងនេះក្តីលោកភ្លុក ផុស បាននិយាយថា លោកនឹងទាក់ទងជាមួយអង្គការស៊ីម៉ាកដើម្បីចុះទៅតំបន់នោះ ដើម្បីឲ្យប្រជាពលរដ្ឋគាត់ស្ងប់ចិត្ត៕
ដោយ(លុចណាម)សៀមរាប
