ខេត្តសៀមរាប ៖ កាលពីព្រឹកថ្ងៃសៅរ៍ ៩កើត ខែ មិគសិរ ឆ្នាំ មមែសប្តស័ក ព.ស២៥៥៩ ត្រូវនឹងថ្ងៃទី ១៩ ខែ ធ្នូ ឆ្នាំ២០១៥ នាចុងសប្តាហ៍នេះ នៅលើក្តារបែនខាងកើតប្រាសាទតាព្រហ្ម នៃខេត្តសៀមរាប មានរៀបចំធ្វើពិធីបួងសួង ដើម្បីសុំនូវសេចក្តីសុខសប្បាយ ពីម្ចាស់ទឹកម្ចាស់ដី និង បារមី អ្នកគង់ប្រថាប់ថែរក្សាការពារនៅគ្រប់ប្រាង្គប្រាសាទ លើទឹកដីប្រវត្តិសាស្ត្រសុំនូវសេចក្តីសុខចម្រើន ជូនដល់ថ្នាក់ដឹកនាំរាជរដ្ឋាភិបាល ព្រឹទ្ធសភា រដ្ឋសភា ប្រជាពលរដ្ឋនិង មាតុភូមិកម្ពុជា ដែលជាទឹកដីសុវណ្ណភូមិនៃយើងឲ្យជួបតែសេចក្តីសុខចម្រើន ក្នុងឱកាសបុណ្យមហាសង្ឃទានរាប់ បាត្រប្រគេនដល់ព្រះសង្ឃ ចំនួន ៤ពាន់១០០អង្គ ដើម្បីរំលឹកព្រះមហាឧបការគុណ និង ឧទ្ទិសមហាកុសល ថ្វាយ អតីតមហាបុរសខ្មែរ គ្រប់សម័យកាល សំខាន់ បុព្វមហាបុរសខ្មែរ នាសម័យមហានគរ ។ ពិធីនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់លោកជំទាវបណ្ឌិត ម៉ែន សំអន ឧបនាយករដ្ឋមន្ត្រី និង ជារដ្ឋមន្ត្រីក្រសួង ទំនាក់ទំនងព្រឹទ្ធសភា រដ្ឋសភា និង អធិការកិច្ច ដែលជាតំណាងដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង លោកជំទាវ ញ៉ែម សាខន ស ខេង ដោយមានការចូលរួមពីសំណាក់ឯកឧត្តម លោកជំទាវ និង អស់លោក លោកស្រីជាភរិយាថ្នាក់ដឹកនាំ មន្ត្រីរាជ និង ប្រជាពលរដ្ឋផងដែរ ។
បន្ទាប់ពីលោកជំទាវឧបនាយករដ្ឋមន្ត្រី ធ្វើការបូជាទៀន ធូក និង ថ្វាយភួងផ្កាភ្ញី នៅរានអស្នាក់ រួចមក ក្នុងពិធីបួងសួងនេះ បានប្រព្រឹត្តធ្វើទៅតាមគន្លងប្រពៃណី ទំនៀមទម្លាប់នៃ ព្រះពុទ្ធសាសនា ព្រះសម្មាសាម្ពុទ្ធ ព្រះបរមគ្រូនៃយើងដែលបានគោរពបដិបត្តិតរៀងមក ។ ក្នុងនោះដែរលោកជំទាវឧបនា យករដ្ឋមន្ត្រី និង ឯកឧត្តម លោកជំទាវ និង អស់លោក លោកស្រី លោកអាចារ្យក៏បានធ្វើពិធីឧទ្ទិសបួងសួង សូមនូវព្រះបារមីដ៏ស័ក្តសិទ្ធិ ដែលគង់ប្រថាប់ថែរក្សានៅលើទឹកដីប្រវត្តិសាស្ត្រ អង្គរដ៏បវរនៃយើង ក៏ដូចនៅក្នុងកម្ពុជារដ្ឋទាំងមូល ព្រមទាំងបារមីព្រះអង្គចេកព្រះអង្គចម លោកយាយទេព តាដំបងដែក លោកតារាជ ព្រះអង្គតូច ព្រះអង្គធំ គង់នៅខ្នងភ្នំគូលែន និង បារមីអរុក្ខអរក្សអ្នកតាគ្រប់ទិសទី និង ទេវតាគង់ថែ រក្សានៅតាមប្រាង្គប្រាសាទនានា នៅលើទឹកដីដ៏ស័ក្តសិទ្ធិ តាមជួយថែរក្សានូវថ្នាក់ដឹកនាំប្រទេសកម្ពុជា ព្រមទាំងសូមជួយឲ្យកិច្ចដំណើរការនៃការ ក្នុងពិធីបុណ្យមហាសង្ឃទានរាប់បាត្រប្រគេនព្រះសង្ឃចំនួន ៤ពាន់១០០អង្គ និង បូជាប្រទីបថ្វាយព្រះរតនត្រ័យ នៅលើទឹកដីអង្គរដ៏ស័ក្តិសិទ្ធិ ក្នុងការសម្តែងនូវភាវៈជាអ្នកគោរព ដឹងគុណ និងធ្វើបដិការកិច្ច ចំពោះបុព្វមហាបុរសរបស់យើងទាំងអស់គ្នា ព្រមទាំងសូមឲ្យព្រះរាជាណាចក្រកម្ពុជា បានជួបនូវតែសុខសន្តិភាព និង មានការអភិវឌ្ឍន៍សេដ្ឋកិច្ចជាតិរីកចម្រើនតទៅអនាគត ៕
ដោយ(លុច ណាម)សៀមរាប
