មណ្ឌលគិរី៖ ប្រជាកសិករដែលបានដាំដំណាំដំឡូងមី ក្នុងភូមិឡៅការ សង្កាត់សុខដុម ក្រុងសែនមនោរម្យ ខេត្តមណ្ឌលគិរី បានត្អូញត្អែថា ផលដំណាំដំឡូងមីស្រស់នៅក្នុងឆ្នាំនេះមានការធ្លាក់ថ្លៃខ្លាំងខុសពីឆ្នាំមុនៗ ដែលធ្វើអោយពួកគាត់ពិបាកក្នុងការទទួលយកបាននូវតម្លៃនេះ គ្រាន់តែទូទាត់ថ្លៃឈ្នូលកម្មករមិនចង់រួចផង បើតម្លៃដំឡូងមីមានការធ្លាក់ចុះដូចឆ្នេះ ពួកគាត់មិនអាចបន្តដាំដំណាំដំឡូងមី តទៅទៀតបានទេនៅឆ្នាំក្រោយ។
ប្រជាពលរដ្ឋជាអ្នកដាំដំណាំដំឡូងមី នៅភូមិឡៅការ បានអោយដឹងបន្តទៀតថា៖ តម្លៃដំឡូងមីស្រស់នៅក្នុងឆ្នាំ២០១៥ ក្នុង ០១គីឡូក្រាមតម្លៃតែ២២០ រៀលតែប៉ុណ្ណោះ បើប្រៀបធៀបនឹងឆ្នាំទៅ និងឆ្នាំ២០១៤ ដំឡូងមីស្រស់ទោះជាធ្លាក់ថ្លៃយ៉ាងណាក៏ដោយ ក៏នៅត្រឹមតែ ២៦០រៀលដែរក្នុង០១គីឡូក្រាម ។
ពួកគាត់បានលើកឡើងទៀតថា៖ការដាំដំណាំដំឡូងមី មានការលំបាក នឿយហត់ខ្លាំង ហើយចំណាយលុយច្រើនណាស់ តាំងតែពីដាំរហូតដល់ប្រមូលផល ។ ប៉ុន្តែពួកគាត់ចេះតែបន្តការដាំទៅ ព្រោះចំការពួកគាត់គ្មានអីដាំក្រៅពីដំឡូងមីនោះទេ ហើយប្រជាកសិករមួយចំនួនបានផ្អាកធ្វើការដកដំឡូងមី ព្រោះមិនមានផលចំនេញ បើដំណាំដំឡូងមីនៅតែធ្លាក់ថ្លៃយ៉ាងនេះ ពួកគាត់មិនអាចធ្វើការដាំបន្តទៅទៀតបាននោះទេ។
ពួកគាត់បានសំណូមពរដល់ រដ្ឋាភិបាលមេត្តាជួយរកទីផ្សារ អោយមានតម្លៃសមរម្យដល់ពួកគាត់ផង ដើម្បីពួកគាត់ងាយស្រួលក្នុងការធ្វើចំការ ព្រោះពួកគាត់ជាកសិករ សង្ឃឹមតែលើដីចំការតែប៉ុណ្ណោះ ដើម្បីប្រកបរបចិញ្ចឹមគ្រួសារបើចំការបានផល ហើយតំលៃធ្លាក់ចុះនោះពួកគាត់មិនដឹង ជាត្រូវសង្ឃឹមអ្វីនោះទេ ៕
