ប៉ៃលិន ៖ លោកជំទាវបណ្ឌិតបានស្រីមុំអភិបាលខេត្តប៉ៃលិន នៅថ្ងៃសៅរ៍ ១២កើត ខែបុស្ស ឆ្នាំជូត ទោស័កព.ស.២៥៦៤ ត្រូវនឹងថ្ងៃទី២៦ ខែធ្នូ ឆ្នាំ២០២០នេះ បានដឹកនាំក្រុមការងារ ចុះសួរសុខទុក្ខ នាំយកគ្រឿងឧបភោគ បរិភោគ និងជួយឧបត្ថមថវិកាមួយចំនួន ដល់លោកវរៈសេនីយ៍ឯក វណ្ណ ដាវី មេបញ្ជាការកងល្បាតទី១ នៃកងការពារព្រំដែនលេខ ៥០៤ ដែលមានជំងឺរលាកសួតធ្ងន់ធ្ងរ កំពុងសម្រាកព្យាបាលនៅគេហដ្ឋាន ស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ក្នុងការចុះសួរសុខទុក្ខនេះដែរលោកជំទាវអភិបាលខេត្តក៏បានស្នើដល់ក្រុមគ្រូពេទ្យឲ្យជួយយកលោកវរះសេនីយ៍ឯក ទៅព្យាបាលបន្តនៅមន្ទីរពេទ្យបង្អែកខេត្តប៉ៃលិន និងជូនពរលោកវរ:សេនីយ៍ឯកឆាប់ជាសះស្បើយនិងបានបន្តភារកិច្ចបំរើជាតិមាតុភូមិយើង។
ជាមួយគ្នាលោកជំទាវបានស្រីមុំ មានប្រសាសន៍សង្កត់ធ្ងន់ថាសុខទុក្ខរបស់ពុកម៉ែបងប្អូនជាសុខទុក្ខលោកជំទាវ សូមពុកម៉ែបងប្អូនគ្រប់រូបចូលរួមគោរពច្បាប់នៃប្រទេសយើងអោយបានត្រឹមត្រូវ និងគោរពវិធានការរបស់ក្រសួងសុខាភិបាលករណីជំងឺកូវិដ១៩ ត្រូវចូលរួម ថែទាំសុខភាព ចាប់ផ្តើមពី អនាម័យស្អាត លាងដៃ ពាក់ម៉ាស់ រក្សាគម្លាត វិធីការពារនេះដើម្បីទប់ស្កាត់ការពារមេរោគដ៍កាចសាហាវមួយនេះ។
លោកវរសេនីយ៍ឯកវណ្ណដាវីមេបញ្ជាការកងល្បាតទី១ នៃកងការពារព្រំដែនលេខ ៥០៤ និងក្រុមគ្រួសារបានថ្លែងអំណរគុណយ៉ាងជ្រាលជ្រៅចំពោះកាត់ចិត្តដល់ប្រពៃរបស់លោកជំទាវបានស្រីមុំនិងថ្នាក់ដឹកនាំដទៃទៀតដែលបាននាំយកនូវគ្រឿងឧបភោគបរិភោគនិងថវិកាមួយចំនួនជូនដល់រូបលោកនិងក្រុមគ្រួសារលោកកំពុងតែឈឺធ្ងន់និងខ្វះខាតថវិកាមួយចំនួនដើម្បីព្យាបាលខ្លួនឱ្យបានជាសះស្បើយពីជំងឺរលាកសួតធ្ងន់ធ្ងរបែបនេះ។
លោកក៏សូមជូនពរលោកជំទាវអភិបាលខេត្តព្រមទាំងសប្បុរសជនទាំងអស់មានសុខភាពល្អ ជួបតែសេចក្តីសុខគ្រប់ប្រការជោគជ័យគ្រប់ភារកិច្ច៕
