នាព្រឹកថ្ងៃសុក្រ ៧កើត ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៣ ខែតុលា ឆ្នាំ២០២០ លោកជំទាវ ពេជ ចន្ទមុន្នី ហ៊ុន ម៉ាណែត អនុប្រធានក្រុមប្រឹក្សាភិបាល សមាគមគ្រូពេទ្យស្ម័គ្រចិត្ត យុវជនសម្តេចតេជោ បានអញ្ជើញ
សួរសុខទុក្ខ និងចែកអំណោយជូនប្រជាពលរដ្ឋដែលរងគ្រោះដោយសារទឹកជំនន់ទឹកភ្លៀងនៅស្រុកសង្កែ ដោយអមដំណើរដោយ ឯក ឧត្តម អ៊ុយ រី ប្រធានក្រុមប្រឹក្សាខេត្តបាត់ដំបង ឯកឧត្តម ងួន រតនៈ អភិបាលនៃគណៈអភិបាលខេត្តបាត់ដំបង ឯកឧត្តមឧកញ៉ា ភួ ពុយ តំណាងរាស្ត្រមណ្ឌលខេត្តបាត់ដំបង ឯកឧត្តម ឧកញ៉ា ឡោក ហ៊ួរ តំណាងរាស្ត្រមណ្ឌលខេត្តបាត់ដំបង ឯកឧត្តម ណុប ដារា អភិបាលរងនៃគណអភិបាលខេត្តបាត់ដំបង ឯកឧត្តម លោកជំទាវ លោក លោកស្រី អាជ្ញាធរគ្រប់លំដាប់ថ្នាក់ និងគណៈប្រតិភូ ព្រមទាំងអ្នកពាក់ព័ន្ធមួយចំនួនទៀត ។
អំណោយជាគ្រឿងឧបភោគបរិភោគ សម្ភារៈប្រើប្រាស់ និងថវិកាមួយចំនួន ជាអំណោយរបស់ឯកឧត្តម ហ៊ុន ម៉ាណែត និងលោកជំទាវ ត្រូវបានចែកជូនប្រជាពលរដ្ឋដែលរងគ្រោះដោយសារទឹកជំនន់ សរុបចំនួន៨៣៧គ្រួសារ ដែលមកពីឃុំកំពុងព្រៀងនិងឃំុកំពង់ព្រះ ស្រុកសង្កែ ខេត្តបាត់ដំបង តាមរយៈលោកជំទាវ ពេជ ចន្នមុន្នី ហ៊ុន ម៉ាណែត នៅពេលព្រឹកមិញនេះ ។
ឆ្លៀតក្នុងឱកាសនោះ លោកជំទាវ ក៏បានពាំនាំនូវការសួរសុខទុក្ខប្រជាពលរដ្ឋ ពីសំណាក់សម្ដេចតេជោ ហ៊ុនសែន និងសម្ដេចកិត្តិព្រឹទ្ធបណ្ឌិត ដែលលោកទាំងពីរកំពុងយកចិត្តទុកដាក់ ដល់បងប្អូនប្រជាពលរដ្ឋដែលកំពុងតែរងនូវការគ្រោះថ្នាក់ដោយគ្រោះធម្មជាតិនេះ ដោយមិនអាចគិតស្មានដល់ និងបានពាំនាំជាអំណោយផ្សេងៗចែកជូនប្រជាពលរដ្ឋ ដែលកំពុងតែរងលំបាកដោយសារគ្រោះទឹកជំនន់ទឹកភ្លៀងនេះ ដើម្បីជួយសម្រាលបន្ទុកបានមួយគ្រាផងដែរ ។ លោកជំទាវបានបន្តទៀតថា សូមបងប្អូនប្រជាពលរដ្ឋត្រូវតែរក្សាអនាម័យជាប់ជានិច្ច ដោយការលាងសំអាតដៃ ការហូបស្អាត ដើម្បីចៀសវាងបញ្ហាការរាគរួស ជម្ងឺអាសន្នរោគផ្សេងៗ ហើយជាពិសេសប្រុងប្រយ័ត្ននូវការចុះទឹក និងថែរក្សាកូនៗកុមារតូចៗ មិនឲ្យចុះទឹកផ្ដេសផ្ដាស ដើម្បីកុំគ្រោះថ្នាក់ប៉ះពាល់ដល់អាយុជីវិត ។ លោកជំទាវ បានធ្វើការថ្លែងអំណរគុណយ៉ាងជ្រាលជ្រៅដល់បណ្ដាអាជ្ញាធរមូលដ្ឋាន និងសប្បុរសជននានា ដែលខិតខំជួយសង្គ្រោះប្រជាពលរដ្ឋបានទាន់ពេលវេលា និងបានឧបត្ថម្ភជាគ្រឿងឧបភោគបរិភោគ ក៏ដូចជាសម្ភារៈប្រើប្រាស់នានាដល់គ្រួសាររងគ្រោះ ។
ឆ្លៀតក្នុងឱកាសនោះ លោកជំទាវ ពេជ ចន្នមុន្នី ហ៊ុន ម៉ាណែត ព្រមទាំងក្រុមការងារងាក៏បានអញ្ជើញទៅចែកអំណោយ និងសួរសុខទុក្ខដល់គ្រួសាររងគ្រោះ២០០គ្រួសារបន្ថែមទៀត នៅចំណុច ភូមិក្បាលថ្នល់ ឃុំឫស្សីក្រាំង ស្រុកមោងឫស្សី ខេត្តបាត់ដំបងផងដែរ ៕
ក្នុងមួយគ្រួសារទទួលបាន អង្ករ៥០ គ.ក មី១កេស ទឹកសុទ្ធ ១កេស ភួយ១ សំពត់១ ប្រេងឆា២ដប កាហ្វេ៦កញ្ចប់ និងថ្នាំពេទ្យ ព្រមទាំងថវិកា ៥០.០០០រៀល ៕
