កំពង់ឆ្នាំង ៖ សេចក្តីរាយការណ៍បានឲ្យដឹងថា កន្លែងជល់មាន់ភ្នាល់គ្នាដាក់លុយយ៉ាងគគ្រឹកគគ្រេងនៅទីនោះមានទីតាំងជាប់ផ្លូវជាតិលេខ ៥ ដែលមានម្ចាស់ឈ្មោះ ជុំ ឡុង និងឈ្មោះហាក់ស្ថិតនៅឃុំពន្លៃស្រុកបរិបូណ៌ ខេត្តកំពង់ឆ្នាំង និងបានធ្វើឲ្យមានការរំខានដល់ប្រជាពលរដ្ឋដែលរស់នៅទីនោះដោយមានសម្លេងហូរកញ្ច្រៀវពីអ្នកញៀនល្បែងទាំងនោះដែលមិនខ្លាចរអែងចិត្តអ្នកដទៃហើយនគរបាលស្រុកហាក់ដូចជាពុំសូវដឹងឮទាល់តែសោះ។
ល្បែងជល់មាន់តាមប្រព័ន្ធអនឡាញភ្នាល់គ្នាដាក់លុយជាច្រើននៅហាងកាហ្វេ គុយទាវជាប់ផ្លូវជាតិលេខ ៥ ដែលមានម្ចាស់ឈ្មោះ ជុំ ឡុង និងឈ្មោះ ហាក់ ស្ថិតនៅឃុំពន្លៃស្រុកបរិបូណ៌ ខេត្តកំពង់ឆ្នាំង កើតមានយូរណាស់មកហើយ តែគ្មានឃើញសមត្ថកិច្ចខាងណាបង្ក្រាបសោះឡើយ ។ គេបានដាក់ការសង្ស័យថា លោក ជាង សុវណ្ណារិទ្ធិ អធិការនគរបាលស្រុក បរិបូណ៌អាចជាប់ពាក់ព័ន្ធនឹងបទល្មើសខាងលើនេះ ។
គេដាក់ការសង្ស័យថា សមត្ថកិច្ចស្រុកបរិបូណ៌ត្រូវថ្នាំសណ្តំរបស់ម្ចាស់ទីតាំងខាងលើទើបមិនចុះទៅហាមឃាត់និងបង្ក្រាបម្តងណាឡើយ ។ ករណីនេះគឺវាផ្ទុយស្រឡះនិងគោលនយោបាយភូមិឃុំមានសុវត្ថិភាព ទាំង៩ចំណុចរបស់រាជរដ្ឋាភិបាល ។
ជាពិសេសបទបញ្ជារបស់សម្តេចក្រឡាហោមស ខេងឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃដែលបានដាក់បទបញ្ជាបង្ក្រាបបទល្មើសល្បែងស៊ីសងខុសច្បាប់គ្រប់ប្រភេទក្នុងមូលដ្ឋានឲ្យបានថមថយនោះ។ទាក់ទិនករណីនេះដែរសារព័ត៌មានយើងមិនអាចសុំការពន្យល់ពីលោកជាងសុវណ្ណារិទ្ធិអធិការនគរបាលស្រុកបរិបូណ៌បានទេនាព្រឹកថៃ្ងទី៨ខែតុលា២០២០នេះ។
សូមបញ្ជាក់ថានៅពេលថ្មីៗនេះលោកខូវលីស្នងការខេត្តកំពង់ឆ្នាំងបានបញ្ជាកម្លាំងចុះបង្អើលម្តងរួចមកហើយបានតែមួយភ្លើងចំបើងប៉ុណ្ណោះបើកឡើងវិញភ្លូកទឹកដីលើសដើម ៕
