ខេត្តស្វាយរៀង៖ នាចុងសប្ដាហ៏កន្លងមកនេះឯកឧត្តមសៅសុខា ប្រធានក្រុមការងារគណះបក្សប្រជាជនកម្ពុជាចុះជួយស្រុករមាសហែក ខេត្តស្វាយរៀង បានអញ្ជើញបើកកិច្ចប្រជុំត្រួតពិនិត្យលទ្ធផលការងារ និងទិសដៅអនុវត្តបន្តរបស់គណបក្សប្រជាជនកម្ពុជា ស្រុករមាសហែកនៅសាលប្រជុំគណះបក្សស្រុក។
ក្នុងឪកាសនោះក៏មានការអញ្ជើញចូលរួមពីសំណាក់ ឯកឧត្តមលោកជំទាវក្រុមការងារថ្នាក់កណ្ដាល, ឯកឧត្តមលោកជំទាវក្រុមការងារថ្នាក់ខេត្ត,គណៈកម្មាធិការបក្សស្រុក,គណៈកម្មាធិការគណបក្សឃុំ និងមន្ត្រីក្រុមការងារដែលមានការពាក់ពន្ធ័ជាច្រើនរូប។
ឯកឧត្តមសៅសុខា ប្រធានក្រុមការងារគណះបក្សប្រជាជនកម្ពុជាចុះជួយស្រុករមាសហែក បានធ្វើការកោតសរសើរ និងវាយតម្លៃខ្ពស់ ចំពោះកិច្ចប្រឹងប្រែងរបស់ក្រុមការងារចុះជួយតាមបណ្ដារភូមិឃុំក្នុងស្រុក ដើម្បីឆ្លើយតបការលំបាករបស់ប្រជាពលរដ្ឋ បានទាន់ពេលវេលា និងមានប្រសិទ្ធភាព។
ប្រធានក្រុមការងារបានសង្កត់ធ្ងន់ថា ក្រុមការងារទាំងអស់ត្រូវចង់ចាំនូវដំបូន្មានរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីថា «ទុក្ខលំបាករបស់ប្រជាជន គឺជាទុក្ខលំបាករបស់គណបក្សយើង របស់មន្ត្រីយើង»។
ឯកឧត្តមបានជំរុញឲ្យសមាជិក សមាជិកាគណបក្ស និងអាជ្ញាធរគ្រប់ថ្នាក់ឃុំក្នុងស្រុក ត្រូវតែបន្តសកម្មភាពឆ្ពោះ ទៅមូលដ្ឋានចុះជួបពលរដ្ឋតាមខ្នងផ្ទះ និងជួយឧបត្ថម្ភពលរដ្ឋជួបលំបាក ដោយផលប៉ះពាល់ពីជំងឺ Covid-19 និងរងគ្រោះដោយគ្រោះធម្មជាតិផ្សេងៗ ជាពិសេសលើការងារធ្វើអត្តសញ្ញាណកម្មគ្រួសារក្រីក្រ ក្នុងអំឡុងពេលជំងឺ Covid-19 ប្រកបដោយតម្លាភាព និងមានប្រសិទ្ធភាពខ្ពស់។
ពិសេសយើងទាំងអស់ រួមគ្នាយកចិត្តទុកដាក់ រក្សាសន្តិសុខ សណ្តាប់ធ្នាប់សង្គម បន្តអនុវត្តឲ្យកាន់តែប្រសើរថែមទៀត អំពីគោលនយោបាយ ភូមិឃុំមានសុវត្ថិភាព ហើយមន្ត្រីបក្សគ្រប់ថ្នាក់ ត្រូវបន្តខិតខំពង្រីកសមត្ថភាព និងបង្កើនស្មារតីទទួលខុសត្រូវ ក្នុងការបំពេញភារកិច្ច ឲ្យទទួលបានលទ្ធផលកាន់តែល្អប្រសើរថែមទៀត ដើម្បីបម្រើផលប្រយោជន៍ជូនប្រជាជន និងប្រទេសជាតិទាំងមូល។
ឯកឧត្តមបានក្រើនរំលឹកដល់សមាជិក សមាជិកាក្រុមការងារថា បេសកកម្មចុះមូលដ្ឋាន ដើម្បីជួយដោះស្រាយរាល់បញ្ហារបស់ប្រជាពលរដ្ឋ ដូច្នេះត្រូវតែប្រឹងប្រែងឱ្យអស់លទ្ធភាពដោះស្រាយបញ្ហាដែលកើតមានចំពោះបងប្អូនប្រជាពលរដ្ឋផងដែរ។
