(ភ្នំពេញ) ÷នាថ្ងៃចន្ទ ១៥រោច ខែអាសាឍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី ២០ ខែ កក្កដា ឆ្នាំ ២០១២០នេះ ក្រុមការងារអនុសាខាកាកបាទក្រហមកម្ពុជា ខណ្ឌដូនពេញ ដឹកនាំដោយ លោក សុខ ពេញវុធ ប្រធានកិត្តិយសអនុសាខា បានចុះសាកសួរសុខទុក្ខអ្នកដែលបានរងគ្រោះដោយសារអគ្គិភ័យបណ្តាលមកពីផ្ទុះធុងហ្គាស ឆាបឆេះរាងកាយចំនួន២នាក់ កាលពីវេលាម៉ោង០៤:៣០នាទីរសៀលថ្ងៃទី ១៨ ខែ កក្កដា ឆ្នាំ ២០២០ ស្ថិតនៅបណ្តោយផ្លូវលេខ៦៣ ភូមិ១២ សង្កាត់ផ្សារថ្មីទី៣ ខណ្ឌដូនពេញ ដោយបច្ចុប្បន្នអ្នករងគ្រោះកំពុងសម្រាកព្យាបាលនៅមន្ទីរពេទ្យកាល់ម៉ែត្រ ។
នាខណៈនោះ លោកប្រធានកិត្តិយសអនុសាខា បានពាំនាំមកនូវការផ្តាំផ្ញើសាកសួរសុខទុក្ខ និងការចូលរួមសោកស្តាយពីឯកឧត្តម ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ និងជាពិសេសពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់អ្នករងគ្រោះទាំងពីរ ព្រមទាំងសូមឲ្យមេត្តាកាត់ចិត្ត ចំពោះហេតុការណ៍ដែលបានកន្លងហួស និងសូមយកចិត្តទុកដាក់មេីលថែទាំ ព្យាបាលជំងឺដោយស្តាប់តាមការណែនាំរបស់គ្រូពេទ្យ ដេីម្បីឆាប់បានជាសះស្បេីយ ទ្បើងវិញ ។
ជាមួយគ្នានេះ ក្រុមការងារបានផ្តល់ជូនក្នុងម្នាក់ៗទទួលបានថវិកាចំនួន៣០ម៉ឺនរៀល ។ សូមបញ្ជាក់ថា សម្រាប់ថវិកាខាងលើនេះ គឺបានការជួយឧបត្ថម្ភពីលោក សុខ ពេញវុធ ចំនួន៤០ម៉ឺនរៀល និងលោកស្រី ប៉ុន ដានី ចំនួន២០មុឺនរៀល ៕
