(កំពង់ឆ្នាំង) ៖លោក សំ ចាន់ថន អភិបាលស្រុកកំពង់លែង អមដំណើរដោយលោក លី ឡា នាយខណ្ឌរដ្ឋបាលជលផលនៃមន្ទីរកសិកម្មរុក្ខាប្រមាញ់ និងនេសាទ ខេត្តកំពង់ឆ្នាំង រួមជាមួយនឹងនាយរងជលផលនៃមន្ទីរកសិកម្ម រុក្ខាប្រមាញ់ និងនេសាទ អភិបាលរងស្រុកប្រធាន អនុប្រធានការិយាល័យចំណុះរដ្ឋបាលស្រុក នៅថ្ងៃទី២៣ ខែមិថុនា ឆ្នាំ២០២០ បានដោះលែងពស់ថ្លាន់ចំនួន៤ក្បាលដែល មាន ទម្ងន់ ១៥គីឡូក្រាមនៅចំណុចភ្នំនាងកង្រី ស្រុកកំពង់លែង។
លោក លី ឡា នាយខណ្ឌរដ្ឋបាលជលផល បានបញ្ជាក់ឱ្យដឹងថា៖ សត្វពស់ថ្លាន់ចំនួន ៤ក្បាលដែលមានទម្ងន់ ១៥គីឡូក្រាមនេះគឺបានមកពីការចាប់បង្ក្រាបបទល្មើសស្វត្វ ព្រៃធនធានធម្មជាតិពីជនល្មើស ហើយត្រូវបានលោក អ៊ិត សុធា ព្រះរាអាជ្ញាអមតុសាលាដំបូងខេត្តកំពង់ឆ្នាំងប្រគល់ឱ្យក្រុមការងារជំនាញពាក់ពន្ធ រួមនឹងអាជ្ញាធរមូលដ្ឋានយកទៅដោះលែងវិញ ។
ជាមួយគ្នានោះ លោក សំ ចាន់ថន ក្នុងនាមអាជ្ញាធរស្រុក បានមានប្រសាសន៍រំលឹកដល់បងប្អូនប្រជាពលរដ្ឋយើងដែលរស់នៅជិតតំបន់ភ្នំនាងកង្រីនោះ មេត្តាចូលរួមជួយថែរក្សាការពារសត្វព្រៃធម្មជាតិទាំងអស់គ្នា ព្រោះនៅតំបន់នោះរាជរដ្ឋាភិបាលកម្ពុជា បានដាក់ចេញអនុក្រឹត្យ ជាតំបន់ប្រើប្រាស់ច្រើនយ៉ាងហើយ នាពេលខាងមុខ តំបន់នេះនឹង ក្លាយជាតំបន់ទេសចរណ៏ដ៏មានសក្តានុពលសម្រាប់យើងទាំងអស់គ្នា ៕
