(ខេត្តកំពត) ៖ នេះជារឿងមួយគួរឲ្យរីករាយខណៈម្ចាស់ផ្លែទុរេនតម្លៃថ្លៃកប់ពពក(១០០០ដុល្លារ) ប្តូរចិត្តឈប់យកលុយពីអាណាព្យាបាលក្មេងប្រុសបីនាក់ ដែលរពិសដៃលួចបេះទុរេនគេមួយផ្លែ នៅក្នុងចម្ការត្រង់ចំណុចភូមិសាស្ត្រស្រុកទឹកឈូ ខេត្តកំពត កាលពីព្រឹកថ្ងៃទី២៥ ខែឧសភា ឆ្នាំ២០២០ ម្សិលមិញ។
ការដែលម្ចាស់ផ្លែទុរេនប្តូរចិត្តមិនយកលុយរហ័សដូចផ្លេកបន្ទោរបែបនេះ ខណៈពេល លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត ចាត់កម្លាំងឲ្យទៅស្រាវជ្រាវនៅក្នុងចម្ការទុរេនដែលម្ចាស់អះអាងថាកន្លងមកធ្លាប់បាត់ទុរេនជាច្រើនផ្លែ ប៉ុន្តែក្រោយពិនិត្យស្រាវជ្រាវឃើញថា ទុរេនក្នុងចម្ការពុំមានការបាត់បង់ច្រើនដូចការអះអាងរបស់អ្នកចាំចម្ការនោះ ទើបធ្វើការណែនាំដល់ភាគីទាំងសងខាង ដោយពុំតម្រូវឲ្យមានការបង់ប្រាក់អ្វីទាំងអស់។
នេះចាត់ទុកជាដំណោះស្រាយមួយដោយយុត្តិធម៌ បើទោះបីវាក៏ជាបទល្មើសមួយដែលត្រូវអនុវត្តទៅតាមទម្រង់ច្បាប់មែនក៏ដោយ ប៉ុន្តែករណីតូចតាចនេះ សមត្ថកិច្ចគ្រាន់យកវិធីតែអប់រំដើម្បីកុំឲ្យពួកគេប្រព្រឹត្តទង្វើបែបនេះតទៅទៀត។
សូមជម្រាបថា កាលពីព្រឹកថ្ងៃទី២៥ ខែឧសភា ឆ្នាំ២០២០ មានក្មេងប្រុសជំទង់បីនាក់បានទៅសុីឈ្នួលបេះម្រេចនៅចម្ការមួយកន្លែងចំណុចភូមិសាស្ត្រស្រុកទឹកឈូ ខេត្តកំពត។លុះបន្តិចក្រោយមកពួកគេក៏ជិះម៉ូតូបំណងទៅចាក់សាំង គាប់ជួនក្រឡេកឃើញចម្ការក្បែរនោះមានទុរេន ទើបចូលទៅបេះ១ផ្លែ ដើម្បីហូបកំដរមាត់លេង ប៉ុន្តែពេលបេះបានហើយបែរជាជួបរឿងស៊យដោយសារអ្នកយាមចម្ការឃើញទាន់ ទើបពួកគេជិះម៉ូតូគេចខ្លួន តែត្រូវអ្នកយាមចម្ការជិះម៉ូតូប្រដេញតាមរហូតមកដល់លំនៅដ្ឋានរបស់ក្មេង នៅភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត ហើយចាប់ប្រគល់ជូនសមត្ថកិច្ចឲ្យជួយចាត់ការ ដោយខណៈនោះអ្នកយាមចម្ការបានប្តឹងទាមទារសំណងទុរេន១ផ្លែ តម្លៃ ១០០០ដុល្លារ អាមេរិក ឬ(៤,០០០,០០០រៀល)។
បន្ទាន់ពីមានការទាមទារតម្លៃទុរេនមួយផ្លែយ៉ាងថ្លៃបែបនេះ អាណាព្យាបាលក្មេងកំហូចទាំងបី ក៏សុំចរចាតម្លៃទុរេន១ផ្លែ គឺនៅសល់ត្រឹម៥០០ដុល្លារ ឬ(២,០០០,០០០រៀល) លុះរៀបចំប្រគល់ប្រាក់ មិនដឹងហេតុអ្វីបានជាអ្នកយាមចម្ការប្តូរចិត្តឈប់យកលុយវិញ ដោយគ្រាន់តែសំណូមពរឲ្យសមត្ថកិច្ចអប់រំណែនាំក្មេងប្រុសទាំងបីនាក់បានហើយ…គឺសុំប្តូរចិត្តមិនយកលុយទេ…បងប្អូន..”បានន័យថាអាកាសធាតុប្រែប្រួលលឿនដូចផ្លេកបន្ទោរ”៕
សារី សារ៉ាត់
