(ខេត្តកែប)៖ នៅព្រឹកថ្ងៃអង្គារ ៧កេីត ខែពិសាខ ឆ្នាំជូត ទោស័ក ព.ស ២៥៦៣ ត្រូវនឹងថ្ងៃទី២៨ ខែមេសា ឆ្នាំ២០២០ នេះ លោក កែន សត្ថា អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកែប អមដំណើរដោយ លោក លោកស្រី សមាជិក ក្រុម ប្រឹក្សា ខេត្ត អភិបាលរងខេត្ត គណៈអភិបាលក្រុង និងក្រុមការងារថ្នាក់ខេត្ត បានអញ្ជើញចុះសំណេះសំណាលសួរសុខទុក្ខប្រជាការពារ ចំនួន៣៦នាក់ ក្នុងចំណោម៣ភូមិ របស់សង្កាត់ព្រៃធំ ក្រុងកែប ខេត្តកែប។
ឆ្លៀតក្នុងឱកាសនោះដែរ លោក កែន សត្ថា អភិបាលខេត្ត កែប បានថ្លែងការកោតសរសើរដល់ប្រជាការពារទាំងអស់ដែលជានិច្ចកាលបានសហការជឋមួយកម្លាំងប្រដាប់អាវុធ ក្នុងកិច្ចការងាររក្សាសណ្តាប់ធ្នាប់នៅក្នុងមូលដ្ឋានបានល្អប្រសើរ។
ជាមួយគ្នានេះ លោកអភិបាលខេត្តក៏បានផ្ដាំផ្ញេីនិងផ្សព្វផ្សាយណែនាំដល់បងប្អូនប្រជាការពារទាំងអស់ ត្រូវប្រកាន់ភ្ជាប់នូវតួនាទី ភារកិច្ច របស់ខ្លួន ដេីម្បីការពារសន្តិសុខ សណ្ដាប់ធ្នាប់ របៀបរៀបរយ តាមគោលដៅនិងមូលដ្ឋានរបស់ខ្លួន មិនតែប៉ុណ្ណោះ បងប្អូនក៏ត្រូវចូលរួមចំណែកអនុវត្តនិងបង្ការ ទប់ស្កាត់ការរីករាលដាល នៃជំងឺកូវីដ-១៩ តាមសារអប់រំ និងណែនាំ របស់ក្រសួងសុខាភិបាល និងរាជរដ្ឋាភិបាល។
ក្នុងពិធីនេះដែរ លោក កែន សត្ថា បានឧបត្ថម្ភជូនបងប្អូនប្រជាការពារក្នុងម្នាក់ៗទទួលបាន អង្ករ២០គីឡូក្រាម សាប៊ូ២ដុំតូច ស្ទីកគ័រអប់រំ ក្រម៉ា១ ថវិកាមួយចំនួន ម៉ាស់៤ប្រអប់ និងអាល់កុល១០លីត្រ ក្នុងមួយភូមិៗ សម្រាប់ការងារក្នុងមូលដ្ឋានរបស់ខ្លួន ៕ សេង ណារិទ្ធ
