(ខេត្តកែប)៖ នៅរសៀលថ្ងៃទី២០ ខែមេសា ឆ្នាំ២០២០ នេះ ក្រុមការងារថ្នាក់ខេត្ត ចុះជួយភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែបដឹកនាំដោយ លោក អ៊ុក ថា អភិបាលរងខេត្តនឹងជាអនុប្រធានទី១ ក្រុមការងារចុះជួយភូមិដំណាក់ចង្អើរ បានអញ្ចេីញចុះផ្សព្វផ្សាយអំពីវិធានការបង្ការ និងការទប់ស្កាត់ការរីករាលដាលនៃជំងឺ កូវីដ-១៩ (Covid-19) តាមការណែនាំរបស់ក្រសួងសុខាភិបាល និងរាជរដ្ឋាភិបាល ស្ថិតក្នុងភូមិសាស្ត្រ សង្កាត់ព្រៃធំ ក្រុងកែប។
ឆ្លៀតក្នុងឱកាសនេះដែរ លោក អ៊ុក ថា អភិបាលរងខេត្ត ក៏បានមានប្រសាសន៍ណែនាំ ដោយជំរុញដល់ប្រជាពលរដ្ឋក្នុងមូលដ្ឋានខាងលើឱ្យចេះថែរក្សាសុខភាព ការរស់នៅមានអនាម័យល្អ ហូបស្អាត ផឹកស្អាត ដើម្បីចាកផុតពីជំងឺដង្កាត់នានា ពិសេសចាកផុតពីការចម្លងរីករាលដាលនៃជំងឺកូវីដ-១៩ ដែលជាមេរោគដ៏សាហាវ។
បន្ទាប់មក លោកអភិបាលរងខេត្ត ក៏បានចែកជូនដល់គ្រួសារដែលជួបការលំបាកចំនួន ២០គ្រួសារ ដោយក្នុងមួយគ្រួសារ ទទួលបានអង្ករ ២០គីឡូក្រាម សាប៊ូ៤ដុំ ស្ទិកគ័រ ម៉ាស់ អាកុល និងថវិកាចំនួន២០,០០០៛ (សរុបសម្ភារៈនិងថវិកា រួមមាន អាល់កុល ១០លីត្រ ស្ទិកគ័របិទតាមខ្នងផ្ទះចំនួន២០០សន្លឹក ម៉ាស២ប្រអប់ និងថវិកា១,៣៣០,០០០រៀល)៕ សេង ណារិទ្ធ
