ភ្នំពេញ ៖ រដ្ឋលេខាធិការទីស្ដីការគណៈរដ្ឋមន្ត្រី និងជាប្រធានសហភាពសហព័ន្ធអ្នកសារព័ត៌មានកម្ពុជា (ស.ស.ស.ក) ឯកឧត្តម ហ៊ុយ វណ្ណៈ នៅរសៀលទី៨ ខែសីហា ឆ្នាំ២០២៤ បានទទួលការប្រគល់ជូននូវ «ពានកិត្តិយសស្នាដៃឆ្នើម» ពីសមាគមមិត្តភាពអ្នកសារព័ត៌មានអាស៊ានប្រចាំប្រទេសថៃ។ ការប្រគល់ពានកិត្តិយសនេះ ធ្វើឡើងក្នុងពេល ដែល សហភាពសហព័ន្ធអ្នកសារព័ត៌មានកម្ពុជា រួមនិងការសម្ពោធផ្សាយ សៀវភៅ សដែលជាស្មាដៃឯកឧត្តម ហ៊ុយ វណ្ណៈ ផងដែរ។
សមាគមសារព័ត៌មាន មានមូលដ្ឋាននៅទីក្រុងបាងកក ប្រទេសថៃ បានសម្រេចប្រគល់ «ពានកិត្តិយសស្នាដៃឆ្នើម» ជូន ឯកឧត្តម ហ៊ុយ វណ្ណៈ ដោយសារសមាគមមើលឃើញពីការលះបង់និងការប្រឹងប្រែងឥតឈប់ឈររបស់ឯកឧត្តម ហ៊ុយ វណ្ណៈ ជាពិសេសគឺការខិតខំដឹកនាំការងារចងក្រង សៀវភៅ ស ស្តីពីមូលដ្ឋានគ្រឹះក្រមសីលធម៌វិជ្ជាជីវៈ ដែលសម្ពោធផ្សាយជាផ្លូវការនៅពេលនេះ។ «ពានកិត្តិយសស្នាដៃឆ្នើម» ប្រគល់ដោយតំណាងសមាគមសារព័ត៌មានថៃ ដែលមានលោក JEERAWAT PRASERT និងកញ្ញា KETSARAPORN MANEECHOT ។
ពានកិត្តិយសស្នាដៃឆ្នើម មានខ្លឹមសារថា៖ «ឯកឧត្តម ហ៊ុយ វណ្ណៈ គឺជាឥស្សរជនឈានមុខគេក្នុងការជួយសង្គមនិងមនុស្សជាតិនៅក្នុងប្រទេសកម្ពុជា ជាពិសេសនៅក្នុងតំបន់អាស៊ាន ដែលតែងតែយកចិត្តទុកដាក់លើការលើកកម្ពស់វិជ្ជាជីវៈសារព័ត៌មាន តាមរយៈការផ្តួចផ្តើមចងក្រង សៀវភៅ ស ដែលអាចចាត់ទុកថាជាកម្រងឯកសាររស់ ដែលមានតម្លៃសម្រាប់អ្នកសារព័ត៌មាន មន្ត្រីព័ត៌មាន សិស្ស និស្សិត និងសាធារណជនទូទៅផងដែរ»។
លោក សេង រាជសី ប្រធានប្រតិបត្តិសមាគមមិត្តភាពអ្នកសារព័ត៌មានអាស៊ានប្រចាំព្រះរាជាណាចក្រកម្ពុជា បានឱ្យដឹងថា ឯកឧត្តម ហ៊ុយ វណ្ណៈ គឺជាបុគ្គលទី១ ដែលទទួលបានពានកិត្តិយសស្នាដៃឆ្នើម ពីសមាគមមិត្តភាពអ្នកសារព័ត៌មានអាស៊ានប្រចាំប្រទេសថៃ ក្រោយសមាគមនេះបានបើកដំណើរការរយៈពេល ៣ឆ្នាំមកនេះ។
ឯកឧត្តម ហ៊ុយ វណ្ណៈ មានប្រសាសន៍ថា «តម្លៃដែលថ្លៃបំផុតលើសពី ពានកិត្តិយសនេះ គឺ «ទឹកចិត្ត» ដែលមិត្តថៃ បានខំចំណាយពេលវេលានិងកម្លាំងកាយពីធ្វើដំណើរពី ទីក្រុងបាងកក មកលើកទឹកចិត្តផ្ទាល់នៅ ទីក្រុងភ្នំពេញ។ ខ្ញុំសូមអរគុណ និងសូមចែករំលែកការលើកទឹកចិត្តនេះ ដល់សហការីដែលរួមដំណើរជាមួយគ្នារយៈពេល៨ឆ្នាំ និងលើសពីនេះក្នុងការងារស្ម័គ្រចិត្តនៅ សហភាពសហព័ន្ធអ្នកសារព័ត៌មានកម្ពុជា»៕
