សៀមរាប៖ព្រះសច្ចានុបាល នឿម វុទ្ធី ចៅអធិការវត្តបារាយមហានទីរតនារាម ហៅវត្តស្វាយរមៀត ក្រុងសៀមរាប សហការជាមួយអាជ្ញាធរ ពាក់ព័ន្ធ បានរៀបចំពិធីប្រណាំងទូកប្រពៃណី រយៈពេល ពីរថ្ងៃ ចាប់ពីថ្ងៃទី ១១ ដល់ថ្ងៃទី ១២ ខែវិច្ឆិកា ឆ្នាំ២០២៣ នៅបារាយណ៍ទឹកថ្លា ស្ថិតនៅក្បែរវត្តស្វាយរមៀត ក្នុងសង្កាត់ទឹកវិល ក្រុងសៀមរាប ដើមី្បរំលឹក និងគោរពដល់វីរៈភាពនៃបុព្វបុរស ទាហានជើងទឹកជំនាន់ដើម ដែលបានពលីជិវិត ក្នុងការធ្វើសឹកសង្រ្គាម តាមផ្លូវទឹក កម្ចាត់ពួកសត្រូវឈ្លានពាន ហើយទទួលបានជ័យជំនះ ជូនជាតិមាតុភូមិអង្គរនៃយើង ព្រមទាំងរំលឹកគុណព្រះធរណី និងព្រះគង្គា ដែលបានផ្តល់ការស្រោចស្រពលើ ភោគផល ដំណាំរបស់ប្រជាកសិករផងដែរ ។
ព្រះសច្ចានុបាល នឿម វុទ្ធី ចៅអធិការវត្តបារាយមហានទីរតនារាម ហៅវត្តស្វាយរមៀត ក្រុងសៀមរាប មានសង្ឃដីកាបញ្ចប់កាប្រណាំងនៅថ្ងៃនេះថា ពិធីប្រណាំងទូកប្រពៃណី នេះ មានកីឡាករ ការិនីទាំងអស់ សរុបចំនួន ២៣៦ រូប ក្នុងនោះ មានទូកចូលរួមចំនួន ១៧ គូ ទូកនារីចំនួន ៣ទូក ដែលក្នុងមួយទូកៗមានចំណុះ៦ នាក់ ព្រមទាំងមានកីឡាករ ប្រណាំងចានដែក ចំនួន ១០គូ ស្មើនឹង ២០ នាក់ទៀតផង។
ព្រះតេជគុណ មានសង្ឃដីកាទៀតថា ជាមួយគ្នានេះ ក៏មានរៀបចំពិធីបណ្តែតប្រទីប សំពះព្រះខែ និងអកអំបុក ផងដែរ ដែលមានជាប់ទាក់ទងនឹងព្រះពុទ្ធសាសនា គឺដើម្បីគោរពបូជា ចំពោះព្រះចង្កូមកែវ របស់ព្រះសម្មាសម្ពុទ្ធ នៅភុជង្គនាគផង និង ដើម្បីរំឭកដល់ទន្សាយព្រះពោធិសត្វបណ្ឌិតផង៕
