មន្ត្រី​ជំនាញ​អះអាងថា ដីព្រៃ​ឧទ្យាន​ជាតិ​ខេត្ត​កែប​មួយផ្នែកធំ​ត្រូវ​គេ​កាប់​ឆ្ការ​យក​ធ្វើ​ជា​ស​ម្ប​តិ្ត​ឯកជន​

(​ខេត្ត​កែប​)៖ ដី​ឧទ្យាន​ជាតិ​របស់​ខេត្ត​កែប​មួយផ្នែក​ត្រូវបាន​គេ​កាប់ឆ្ការ​វាត​យក​អស់​មួយអន្លើ ខណៈដី​ចំណុច​នេះ​ត្រូវបាន​វាស់វែង​ជូន ដោយ​ក្រុម​យុវជន​ស្ម័គ្រចិត្ត​កាលពី​អំឡុង​ឆ្នាំ​២០១២​កន្លងទៅ​។​

​យោង​តាម​ការលើកឡើង​ពី​សំណាក់​លោក ឡាយ វណ្ណា​រ៉ា អនុប្រធាន​មន្ទីរ​ដែនដី នគរូបនីយកម្ម សំណង់ និង​សុរិយោដី​ខេត្ត​កែប ដែល​កំពុង​ដឹកនាំ​មន្ត្រី​ចុះ​វាស់វែង​ដើម្បី​ផ្ទៀងផ្ទាត់​ប័ណ្ណកម្មសិទ្ធិ​ជូន​ម្ចាស់​ដី បាន​បញ្ជាក់​ប្រាប់​ដល់​អ្នក​យក​ព័ត៌មាន នៅ​រសៀល​ថ្ងៃ​ទី​១៤ ខែ​កុម្ភៈ ឆ្នាំ​២០១៩​នេះ​ថា តាម​ការពិត​ដី​ដែល​កំពុង​វាស់​ស្ទង់​ដោយ​ម៉ាស៊ីន​ស្វ័យប្រវត្តិ GPS នេះ គឺជា​ដី​ដែល​បាន​វាស់វែង​ដោយ​ក្រុមយុវជន​ស្ម័គ្រចិត្ត​កាលពី​ឆ្នាំ​២០១២​កន្លងមក ប៉ុន្តែ​ពេល​នេះ​ម្ចាស់​ដី​បាន​ហៅ​គ្រឿងចក្រ​មក​ឈូសឆាយ ព្រមទាំង​កាប់ឆ្ការ​វា​តចូល​ដល់ដី​ឧទ្យាន​ជាតិ​របស់​ខេត្ត​កែប​មួយផ្នែកធំ ទើប​ក្រុម​ជំនាញ​បាន​ចុះ​ត្រួតពិនិត្យ​តែម្តង​។​លោក​បាន​បន្តថា ដី​ដែល​កំពុង​វាស់វែង​ដើម្បី​ផ្ទៀងផ្ទាត់​ខាងលើនេះ ស្ថិតក្នុង​ភូមិ​កែវ​ក្រសាំង សង្កាត់​កែប ក្រុងកែប ខេត្ត​កែប ហើយ​កន្លង​មក​ម្ចាស់​ដី​បាន​កាប់ឆ្ការ​តែ​ផ្នែក​ខាងក្រោម​ចង្កេះភ្នំ​ប៉ុណ្ណោះ​ដែល​ជា​ដី​កម្មសិទ្ធិ​ប៉ុណ្ណោះ លុះ​ចូល​ដល់​ដើមឆ្នាំ​២០១៩​នេះ ស្រាប់តែ​បន្ត​កាប់​វាត​យក​តាម​សសៀរ​ជើងភ្នំ​រហូត​ដល់​ដី​ឧទ្យាន​ជាតិ​ខេត្ត​កែប​តែម្តង​។​

​ជាមួយនឹង​ការវាស់វែង​របស់​មន្ត្រី​ជំនាញ​នាពេលនេះ មិនមែន​បានន័យថា​ចង់​ចោទប្រកាន់​ពី​ការរំលោភបំពាន​ដី​រដ្ឋ​នោះឡើយ ផ្ទុយ​មកវិញ​គឺជា​ការវាស់វែង​ក្នុង​គោលបំណង​ផ្ទៀងផ្ទាត់ កំណត់​ក្បាលដី​ជាក់លាក់​ជូនទៅ​ម្ចាស់​ដី រីឯ​ដី​ឧទ្យាន​ជាតិ​ដែល​រង​ផលប៉ះពាល់​នោះ​ដាច់ខាត​ត្រូវតែ​ដក​ហូត​ប្រគល់​ទៅ​ខាង​ឧទ្យាន​ជាតិ​ខេត្ត​កែប​វិញ​ដោយ​គ្មាន​លក្ខខណ្ឌ​។​

​សូមបញ្ជាក់​ថា តាម​ការ​បង្ហើប​ពី​ក្រុម​ការងារ​ជំនាញ ដែល​វាស់វែង​ផ្ទៀងផ្ទាត់​នោះ បានបញ្ជាក់​អះអាងថា ខណៈ​ពេល​នេះ​ម្ចាស់​ដី​ចំណុច​ខាងលើ បាន​កាប់ឆ្ការ​វាត​យក​ដី​ឧទ្យាន​ខេត្ត​កែប​ប្រមាណ​ជាង ៥.០០០​ម៉ែត្រការ៉េ​ឯណោះ​៕
​សេង ណា​រិទ្ធ​

Filed in: ខេត្តកែប

Recent Posts

Bookmark and Promote!

© 2019 ឆន្ទៈខ្មែរ | Chhantak Khmer News. All rights reserved. XHTML / CSS Valid.
error: Content is protected !!